Законот предвидува со пописот да се опфатат сите лица кои се државјани на Северна Македонија кои имаат живеалиште или престојувалиште во земјава без разлика дали во моментот на спроведување се наоѓаат во земјава или странство. Понатаму, странците кои имаат одобрен престој, како и лицата без државјанство кои во моментов на спроведување се затекнати во државата
По изгласувањето на Законот за попис во Собранието пред три дена, на ред е тој да биде потпишан и од шефот на државата, Стево Пендаровски. Законот е веќе во Вила Водно каде го испратил претседателот на Собранието Талат Џафери, истиот ден по изгласувањето во парламентот, а од кабинетот на Пендаровски велат дека тој прво ќе се консултира со правници.
„Претседателот Пендаровски врши консултации со правни експерти за донесениот Закон за пописот и во наредните неколку денови ќе го соопшти својот став“,
велат од кабинетот на Пендаровски.
Пендаровски во рок од седум дена од денот кога му е доставен законот, треба да го потпише указот за прогласување на законот или писмено го известува претседателот на Собранието доколку одлучи да не го потпише указот за прогласување на законот.
Ако претседателот на Републиката одлучи да не го потпише указот за прогласување на законот, Собранието повторно го разгледува законот согласно со Деловникот, во рок од 30 дена од денот на донесувањето на законот. По повторното разгледување на законот, амандмани можат да се поднесуваат само во врска со укажувањето на претседателот на Републиката.
ВМРО-ДПМНЕ бара Пендаровски да не го потпише
Законот во Собранието беше изгласан од владејачкото мнозинство со помош од опозициската коалиција на Алијанса за Албанците (АА) и Алтернатива, додека најголемата опозициска партија, ВМРО-ДПМНЕ, остана на тоа дека Законот не е добар бидејќи ќе значи политичка, а не статистичка операција.
Партијата побара од претседателот и да не го потпишува Законот.
„Претседателот Пендаровски примарно најдобро да се консултира со експерти од оваа област. Доколку се консултира со вистински и објективни експерти по ова прашање верувам дека ќе го упатат кон тоа дека не е овој закон правилниот начин за спроведување на попис. Ќе повторам попис треба, попис треба час поскоро. Но, попис треба земајќи ги предвид современите алатки коишто ги имаме во 21 век. Треба електронски попис на Македонија, а Македонија има капацитет тоа да го направи и притоа нема никој да се сомнева во конечните статистики коишто ќе произлезат од него“,
изјави пратеникот Тимчо Муцунски одговарајќи на новинарски прашања на вчерашната прес-конференција.
Од ВМРО-ДПМНЕ најавија дека и со собирање на граѓански потписи ќе бараат да се поништи Законот.
СДСМ обвинува за антидржавно однесување
Владејачкиот СДСМ, пак, и пред и по донесувањето на Законот уверува дека потписот ќе биде спроведен по сите меѓународни стандарди, а однесувањето на ВМРО-ДПМНЕ го оценуваат како антидржавно.
„Овој начин на деструктивно однесување на ВМРО-ДПМНЕ околу собирањето на потписи и воедно повикувањето на бојкот на граѓаните за да го бојкотираат пописот е крајно антидржавно однесување. Се надеваме дека во наредниот период ќе ги преиспитаат своите одлуки околу собирањето на потписи заради тоа што деструктивното однесување и повикувањето за непочитување на законот за попис којшто е од исклучителна важност за нашата држава и за креирањето на понатамошните политики особено во однос на економијата“,
изјави пратеничката од СДСМ, Марија Георгиевска.
Социјалдемократите нагласуваат дека пописот е неопходен и по речиси две децении тој ќе с спроведе и ќе даде релевантни и точни податоци за географските, демографските, економските, образовните, миграциските и културолошките карактеристики на населението. Таквите податоци се неопходни, нагласуваат, за креирање на политиките за развој на државата.
Што предвидува Законот?
Изгласаниот закон во Собранието предвидува дека пописот во земјава ќе се спроведе од 1 до 21 април годинава. Тој предвидува со него да бидат опфатени сите лица кои се државјани на Северна Македонија кои имаат живеалиште или престојувалиште во земјава без разлика дали во моментот на спроведување се наоѓаат во земјава или странство. Понатаму, странците кои имаат одобрен престој, како и лицата без државјанство кои во моментов на спроведување се затекнати во државата.
Од друга страна, пак, нема да бидат опфатени странските дипломати и членовите на нивните семејства, странскиот воен персонал и сите странци кои во тој момент ќе бидат во Северна Македонија заради службен пат, приватна посета, лекување, туристички и слични патувања.
За државјаните кои се на привремена работа или престој во странство, податоците ќе може да ги даде најблиското лице, при што ќе го даде и својот и матичниот број на лицето кое е отсутно. На овие лица ќе им се овозможи и сами да де попишат во периодот од 1 март и 21 април преку посебна апликација на веб-страницата на Државниот завод за статистика.
Законот предвидува дека покрај податоците од терен ќе се вкрстуваат и со податоците од институциите како: МВР, Министерството за информатичко општество и администрација, Министерството за образование и наука, Министерството за труд и социјална политика, Агенцијата за вработување, УЈП, ПИОМ, Управа за водење матични книги, Агенцијата за катастар и ДЗС.
