Од двајцата „преостанати“ пратеници на Беса се очекува да се изјаснат како ќе дејствуваат во наредниот период, од што зависи дали ќе останат десно (во таборот на мнозинството) или ќе се преселат лево (во опозициската редица) во пленарната сала
Шеснаесет месеци по конституирањето на овој собраниски состав. четворицата пратеници на Алтернатива, меѓу кои и лидерот Африм Гаши, се преселија денеска во владејачката редица во парламентот, на првата пленарна седница што се одржува по неуспешната иницијатива на опозицијата за уривање на Владата со изгласување недоверба.
Денешната собраниска седница се одржува во „салата на куполи“, поради интервенции во пленарната сала, така што медиумите повторно немаат можност директно да ја следат расправата. Меѓутоа, соговорници од Собранието потврдија за „360 степени“ дека пратениците на Алтернатива се во „десната редица“, веднаш зад пратениците на ДУИ, а откако Гаши постигна договор со премиерот Зоран Заев за приклучување кон Владата и кон парламентарното мнозинство. Во владејачката редица остана и Кастриот Реџепи, кој влезе во парламентот, како пратеник на Беса, а од листа на коалицијата на СДСМ.
Двајцата „преостанати“ пратеници на Беса, Басри Бајрами и Фадил Зендели (еден од потпретседателите на парламентот), според информациите, денеска не се појавиле во Собранието. Од нив се очекува да се изјаснат како ќе дејствуваат во наредниот период, од што зависи дали ќе останат десно (во таборот на мнозинството) или ќе се преселат лево (во опозициската редица) во пленарната сала.
Собранието денеска заседава по третпат по завршувањето на локалните избори, чии резултати предизвикаа големи турбуленции на политичката сцена во земјава. На првата постизборна седница беа верификувани мандатите на новите пратеници кои влегоа на местата на новоизбраните градоначалници од СДСМ и од ВМРО-ДПМНЕ. Истата вечер беше најавена иницијативата за недоверба на Владата, за што, практично, не се ни одржа собраниска седница, затоа што во салата немаше кворум од најмалку 61 пратеник.
На дневен ред на седницата што почна денеска се четириесетина точки, меѓу кои и буџетот за следната година, кој треба да биде усвоен во рок од пет дена. За разлика од неуспешната седница за недоверба на Владата, денеска собраниската сала е полна, односно во расправата и гласањето учествува и опозицијата, така што, по подолго време, нема проблеми со кворумот.
Седницата почна со констатирање на оставките на министерот за земјоделство од редовите на Беса, како и на заменик-министрите за образование и за култура.
Додека Беса беше дел од владејачката коалиција, парламентарното мнозинство броеше 62 члена, односно само еден повеќе од неопходниот минимум.
Во овој момент, додека се чека формирање на нова влада, со друг мандатар, мнозинството брои 64 пратеници, по одлуката на Алтернатива да го напушти опозицискиот табор.