Досега во кланицата со 6 500 вработени има над 1 300 заразени
Вработени во најголемата германска кланица која стана жариште на коронавирусот, „Тонис“, отпатувале во своите татковини пред да се прогласи карантин во округот каде што се наоѓа компанијата.
Агенцијата ДПА, која цитира извори од округот каде што се наоѓа кланицата, објави дека според изјави на вработените најголем дел од оние што заминале се Полјаци, Романци и Бугари.
Но не е познато колкав дел од повеќе од 6 500 вработени во „Тонис“ си заминале во своите земји.
Во кланицата работат луѓе од над 87 земји, најмногу од Романија и Полска. Во исто време, од сите странски работници, околу една третина се во Германија со своите семејства.
Во кланицата досега има најмалку 1 331 заразени со коронавирусот.