При претресот одземен е електронски дневник на издадени фалсификувани ковид сертификати во периодот од 19 декември минатата година до денот на претресот, а извршени се и службени разговори со две лица
Претрес на три локации во дојранско бил извршен вчера од страна на Одделот за криминалистичка полиција и СВР Струмица – ОВР Гевгелија, по дојавите дека казино во Дојран издавало лажни ковид сертификати.
Како што информира МВР, при претресот одземен е електронски дневник на издадени фалсификувани ковид сертификати во периодот од 19 декември минатата година до денот на претресот, а извршени се и службени разговори со две лица.
Увид е извршен и во компјутерскиот список на грчки државјани кои се пријавиле за тестирање како и во просториите на „импровизираниот“ медицински пункт во казино во Стар Дојран.
„Целокупната одземена документација ќе биде доставена до Основното јавно обвинителство во Гевгелија за понатамошно постапување, а МВР ќе ги преземе сите мерки и активности за кои ќе добие насоки од надлежното обвинителство со цел расчистување на случајот“
велат од МВР.
Претходно грчката телевизија Опен објави сторија во која се тврди дека казино во близина на граничниот премин Дојран-Дојрани на македонска територија им обезбедува лажен негативен тест на посетителите, за тие да можат да се вратат во Грција.
Според овие информации, станувало збор за лажни потврди за брз антигенски тест, и тоа издадени од овластен дијагностички центар, но засега за ова нема информации од надлежните институции во земјава.