Полицијата против 21-годишникот поднела пријава за сторени прекршоци од Законот за прекршоци против јавниот ред и мир
По вчерашното претепување на млад човек облечен како Дедо Мраз во Славонски Брод, денеска се огласи тамошната полиција.
Од полицијата велат дека вчера околу 15:15 часот добиле пријава за тепачка во Славонски Брод од повеќе лица.
„На местото на настанот веднаш биле испратени полициски службеници, кои ја потврдиле вистинитоста на пријавата, при што затекнале 21-годишен маж под дејство на алкохол како ги навредува полициските службеници, поради што бил приведен со употреба на сила“,
известуваат од полицијата.
Полицијата против 21-годишникот поднела пријава за сторени прекршоци од Законот за прекршоци против јавниот ред и мир. Оттаму додаваат дека „ќе следи натамошна кривична истрага поврзана со кривичното дело учество во тепачка“.
Во Општата болница во Славонски Брод се пријавил уште еден 21-годишник кој бил учесник во тепачката, на кој му биле констатирани тешки физички повреди, а по укажаната лекарска помош е пуштен дома.
„Полициските службеници приведоа повеќе лица на возраст од 20 до 23 години за кои се води кривична истрага поради сомнение дека сториле кривично дело учество во тепачка. Полициските службеници продолжуваат со понатамошна работа за утврдување на фактите и околностите на настанот и доставување соодветни пријави“,
заклучуваат од полицијата.
Вчера, на социјалните мрежи се ширеше видео од бруталното претепување на млад човек облечен како Дедо Мраз во Славонски Брод.
На видеото од тепачката се гледа како млад човек облечен како Дедо Мраз лежи на патот. Кога младиот човек се обидел да стане, му пришол друг млад човек и силно го удрил со нога во главата. После тоа, удрениот млад човек паѓа во несвест на асфалтот.