Во објава на социјалните мрежи студентите напишаа дека јавните медиумски сервиси не известуваат вистинито и дека тоа е причината за блокадата пред РТС
Српските студенти кои од синоќа ги блокираа влезовите на зградата на Радио-телевизија Србија (РТС) во Белград ја поминаа ноќта таму и од утринава го блокираат пристапот до објектот. Тие повеќе од десет часа ги блокираат сите три влеза во зградата на српскиот радиодифузен сервис.
Во објава на социјалните мрежи студентите напишаа дека јавните медиумски сервиси не известуваат вистинито и дека тоа е причината за блокадата.
„Јавниот медиумски сервис работи против сите нас. Бидејќи Регулаторното тело за електронски медиуми (РЕМ) не постои, никој не може да ги скроти. Протестот ќе трае додека не се распише нов конкурс за РЕМ или додека РТС не се затвори“,
напишаа студентите во објава на Инстаграм.
Освен пред зградата на РТС, од синоќа блокада имаше и пред објектот на Радио-телевизија на Војводина (РТВ) во Нови Сад. Блокадата заврши утринава во 5 часот кога студентите се разотидоа по доаѓањето на специјалните полициски сили кои поставија кордон пред зградата, дозволувајќи им пристап на вработените.
РТВ од утрово се емитува нормално.