Едно лице во моментов е на распит во полициска станица во врска со видеото кое се појави на твитер, а на кое се гледа и слуша недолично однесување на две момчиња кон сопатници во автобус на ЈСП, дознава „360 степени“ од извори од истрагата. Полицијата го бара и вториот насилник од видеото.
На социјалните мрежи денеска кружи видео, во кое двете момчиња им се закануваат на сопатниците, додека автобусот е во движење. Ситуацијата се вжештува откако тие добиваат укажување од сопатничка дека не носат маски.
„Не се занесувајте“;
„Значи маска, абе нема држава, ќе работи државата за мене и полиција. Немој госпоѓо…ќе те носам у киселина, ќе те топам, не знаеш со кого имаш работа“;
„Животот сум го поминал со секаков проблем, она ќе ми каже“,
се дел од коментарите на момците кои стојат внатре во автобусот со маските на брада.
Сè уште нема информации кога точно се случил настанот, на која релација се движел автобусот и дали тие физички нападнале девојка која ги снимила, како што стои во описот на видеото објавено на твитер.