Институциите моментно работат на техничко ниво, така што Владата е преодна, а парламентот не може да заседава и да носи одлуки, освен во случај на прогласување вонредна состојба. Паралелно, течат роковите за спроведување на изборните дејствија
Политичкиот врв на државата ќе се собере попладнево на координација во Владата, на иницијатива на техничкиот премиер Оливер Спасовски, а поради развојот на ситуацијата со коронавирусот и мерките што треба да се преземат. На средбата се очекува да присуствуваат сите лидери на парламентарните политички партии што имаа самостоен настап на последните парламентарни избори.
Според најавите, на средбата ќе учествуваат лидерите и по уште еден претставник на СДСМ, ВМРО-ДПМНЕ, ДУИ, БЕСА, ДПА, Алијанса за Албанците и Алтернатива. Ситуацијата со новиот вирус, од кој веќе се заразени девет лица во земјава, според проценките во политички кругови, може да го загрози и тековниот изборен процес. Дополнителна компликација е тоа што, во функција на изборите, и институциите моментно работат на техничко ниво, така што владата е преодна, а парламентот не може да заседава и да носи одлуки, освен во случај на прогласување вонредна состојба. Паралелно, течат роковите за спроведување на изборните дејствија, а на полноќ истекува рокот за доставување на кандидатурите за пратеници во ДИК.
Кампањата треба да почне на 23 овој месец, што би значело за десетина дена, до кога приближно би важеле и последните мерки што ги донесе Владата, доколку нема влошување на ситуацијата.
Во врска со можноста за одложување на изборите, министерот за здравство Венко Филипче рече дека е многу тешко да се предвиди како ќе се развива ситуацијата. Во владејачкиот СДСМ засега не се размислува за одложување на изборите. Партискиот лидер Зоран Заев вчера изјави дека, поради коронавирусот, можеби претставувањето на партиските програми и на кандидатите треба во најголем дел да оди по електронски пат.
И во соседна Србија, каде што се закажани избори на 26 април (две седмици по изборите во земјава), веќе се разгледуваат варијанти како да се води кампањата или, пак, за евентуално одложување на изборите. Српскиот претседател Александра Вучиќ изјави дека и ако има одложување на изборите тоа би било не подолго од две седмици. За кампањата тој рече дека е пожелно да има повеќе ТВ-дебати, а митинзите да се одржуваат на отворено, а не во затворени простории.