СДСМ, ВМРО-ДПМНЕ и Левица денеска преку прес-конференции и соопштенија се осудуваа и обвинуваа околу бугарскиот клуб „Цар Борис Трети“ и чија е вината за неговото отворање
Денешното отворање на бугарскиот клуб „Цар Борис Трети“ во Охрид предизвика политичките партии од власта и опозицијата да си играат повторно пинг-понг со осуди и обвинувања.
Од едната страна владејачкиот СДСМ вели дека се бара начин за институционално да се најде решение за овие прашања. Од ВМРО-ДПМНЕ велат дека повеќе нема да толерираат од СДС да одобруваат никулци на фашизмот, а од политичката партија Левица, која беше и организатор на денешниот протест, обвинија дека од СДСМ и ДУИ нема никаква осуда за отворањето на клубот.
Ненад Коциќ, пратеник на СДСМ, не денешната прес-конференција рече дека СДСМ осудува провокации од каков било вид.
„Оваа земја почива на херојството на нашите предци и делата на македонската антифашистичка борба. За нас значењето на антифашистичката борба е исклучителна, државничка и безвременски важна. Затоа, наша обврска е институционално да најдеме решенија за да ги затвориме овие прашања кои сме свесни дека иритираат, но уверени сме дека се спорадични и предизвикани од нечиј трет интерес. Постојат поединци и партии кои сакаат нашите две држави да останат во вечен конфликт кој нема да донесе ништо добро“,
нагласи Коциќ.
Факт е, додаде Коциќ, дека нашите закони во овој дел имаат одредени недоречености, за што се потребни законски промени.
Министерството за правда веќе работи на нов закон за кој повикуваме преку широка јавна дебата да се разгледа и во еден инклузивен процес да се дојде до најдоброто решение. Секако, треба да биде усогласен со регулативата на ЕУ. СДСМ секогаш бил на вистинската страна на историјата за разлика од ВМРО-ДПМНЕ“,
додаде Коциќ.
Тој додаде дека ВМРО-ДПМНЕ е партија која во својот Статут има континуитет со Ванчо Михајлов, сојузникот и извршителот на третиот рајх, го велича неговиот лик и дело.
„ВМРО-ДПМНЕ прво треба да си го промени партискиот Статут, да си расчисти во самата партија за што се, па потоа да поднесува закони. Граѓаните знаат дека фигура на Ванчо Михајлов беше поставена во музејот во Ново Село во Штип и во музејот во Скопје, како дел од криминалот проект ‘Скопје 2014’. Лицемерно, безобразно и дрско е ВМРО-ДПМНЕ, партијата којашто е идеолошки поклоник на луѓето што биле извршители на третиот рајх да го обвинува СДСМ, партијата која е единствен наследник и поддржувач на вредностите од НОБ во државата“,
рече Коциќ упатувајќи порака до сите да се стремат на соработка, меѓусебно почитување и практикување на европски вредности.
Од друга страна, пак, ВМРО-ДПМНЕ преку соопштение вели дека СДС е партија чиј претседател кажа дека македонскиот и бугарскиот народ се ист народ и трајно ги нагриза нашите позиции и го загрози идентитетот.
„СДС се партијата која даде легитимитет на бугаризацијата. Заев, од позиција на премиер, долгорочно ги оштети македонските позиции. Од изјавите на Заев беа фрапирани и до бескрајна радост донесени и најголемите бугарски шовинисти. Од изјавите на Заев почна целата негација на Македонија, за истата да кулминира со отворањето на клубови со фашистички имиња во Македонија со дезертерот Ковачевски. Ковачевски не направи ништо да спречи отворање на клубови со фашистички имиња во Македонија, напротив тоа го дозволи“,
се вели во соопштението од ВМРО-ДПМНЕ.
Од партијата додаваат дека повеќе нема да толерираат од СДС да одобруваат никулци на фашизам, и затоа пратеничката група на ВМРО-ДПМНЕ ќе поднесе закон за измена и дополнување на Законот за здруженија и фондации, со што ќе се спречи идно формирање, но и реакција на веќе постоечките регистрирани здруженија во земјава.
Организаторите на денешните протести во Охрид, против отворањето на бугарскиот културен клуб „Цар Борис Трети“, политичката партија Левица, обвини дека нема никаква осуда од СДСМ и ДУИ за отворањето на клубот.
„Ние сме организатори на протестот против фашистичкиот клуб. Денеска ја поднесуваме и иницијативата за референдум против пробугарскиот предлог. Денес сме сведоци како се вее знамето на цар Борис, додека немаме никаква осуда од Владата на СДСМ и ДУИ. Напротив, вчера и отворено МНР на Бујар Османи директно застана на страната на промоција на фашизмот и побара да се почитува правото на почитување на сите граѓани, дури и на оние кои негуваат фашистички вредности“,
изјави генералната секретарка на партијата Јована Мојсоска.
Очекуваат, според Мојсоска, нивниот предлог за референдум да помине и на народот да му се даде можност да се изјасни дали е против „уцените од страна на Бугарија“.
„Ќе се бориме и понатаму. Очекуваме предлогот за референдум да помине и народот, како што ѝ доликува на една демократска земја, да се изјасни против сите овие уцени кои доаѓаат од страна на Бугарија со кои Македонија е принудена да се откаже од своето АСНОМ минато“,
рече Мојсоска.
Таа додаде дека во текот на вчерашниот ден од страна на полицијата бил вршен притисок врз членови на партијата и дека, како што рече, имало „експлицитно пречекорување на нивните овластувања“.
На протестот во Охрид се приклучија и членови на охридскиот општински Совет од редовите на Левица и ВМРО-ДПМНЕ.