Ова е само прв чекор. Ако се забележи во други сектори дека има големо отстапување на цените, бидејќи тука не се предвидени алкохолните и безалкохолните пијалоци и хигиенските производи, ако кај нив има зголемување на цените, како кај храната, тогаш и тука ќе делуваме, вели Бектеши
Поевтинувањето на производите за 10 отсто нема да се заснова на септемвриските цени, туку на оние од месеците кога важеа одредни мерки, кога Владата се откажа од одредени давачки како царински или од ДДВ, и кога цените беа пристојни, вели министерот за економија Крешник Бектеши.
„Намалувањето нема да биде со датум и цена која била во текот на септември оваа година, туку ќе биде од други месеци, кога имаше пристојни цени, цени кои моѓе да бидат образложени и на тие цени ќе треба да се направи намалување за 10 отсто. Денеска тоа им го пренесов и на ланците на супермаркети. Цените од септември нема да бидат реферетни во делот на намалувањето од минимум 10 отсто. Значи ако во март, да го земеме како пример, цената била сто денари и во септември била 150 денари, реферетна цена во намалувањето ќе биде 100 денари, нема да биде 150 денари. И врз тие сто денари треба да има минимум намалување од 10 отсто“,
појасни Бектеши во вечарашното гостување во емисијата „Вин Вин“ на Телевизија Телма.
Министерот рече дека со одлуката ќе се овозможи намалување на 50-тина производи, но не само од 10 отсто туку доколку се процени дека цените биле енормно зголемени, намалувањето може да биде и 15 отсто.
Бектеши најави дека на неделна база ќе се следат сите движења на цените, посебно во прехранбената индустрија.
„Ова е само прв чекор. Ако се забележи во други сектори дека има големо отстапување на цените, бидејќи тука не се предвидени алкохолните и безалкохолните пијалоци и хигиенските производи, ако кај нив има зголемување на цените, како кај храната, тогаш и тука ќе делуваме“,
рече Бектеши.
Со Одлуката, како што рече Бектеши предвидено и сите вклучени во ланецот на трговијата, вклучително и производителите, дека имаат обврска да произведуваат и да снабдуваат минимум 70 отсто од количините кои ги снабдувале или произведувале претходниот месец.
„Тоа значи дека одредени компании може да одлучат да го намалат производството или, пак, да не ги снабдуваат согласно барањата и потребите на малопродажбата. Тоа ќе биде дополнителна обврска и врз тоа ќе се прошири опсегот и компетенциите што ги има Државниот пазарен инспекторат“,
рече Бектеши.
Министерот повторно најави дека следната недела во Собранието ќе биде доставено ново законско решение за нефер трговски практики, што според него, било предлог на премиерот Димитар Ковачевски и на што заедно работеле. Ова ќе биде прво вакво законско решение кај нас и во регионот.
Според Бектеши, со овој закон ќе се укинат многу давачки кои го оптоваруваат ланецот од производство, па се до крајниот производ.
Со Бектеши, во емисијата дебатираше потпретседателката на ВМРО-ДПМНЕ, Гордана Димитриеска Кочоска која за законот за нефер трговски практики рече дека зборувале уште на почетокот на годинава.
„За законот за нефер трговски практики зборувавме на почетокот на годината токму јас и Крешник Бектеши и уште тогаш зборував дека тоа е една од причините поради кои имаме повисока инфлација од таа која можеби би требало да ја имаме меѓутоа во тој период сите го зборуваа истото. Тоа беше почеток на година, сега месец септември сме а многу доцниме со се“,
рече Димитриеска Кочоска.
Таа додаде дека тоа веќе во Хрватска е воведено, во Србија исто и тоа не е нешто ново во Европа туку го има од пред неколку години, а ние доцниме.
Министерот изрази разочарување од работата на Државната комисија за конкуренција за која кажа дека при енормно зголемување на цените не реагирале и не направиле никакво истражување на пазарот или истрага. Најави дека во вторник на Државниот пазарен инспекторат ќе им се прошират ингеренциите за да можат веднаш да постапат и да го затворат објектот без да поминат одредени судски постапки.
Вчера, пак, Бектеши најави дека во вторник на владина седница ќе се донесе одлука за замрзнување на цените на во прехранбената индустрија, а до 30 ноември се забранува и акциската продажба на одредени прехранбени производи и кампањите кои супермаркетите ги воведуваат.
Од Државниот пазарен инспекторат (ДПИ) најавија дека кога Владата, по предлог на Министерството за економија, ќе донесе одлуки во врска со намалување на цените, ДПИ ќе постапува кај сите субјекти, без селекција и без компромис, како и досега.