Српските истражни органи сè уште не го пронајдоа телото на двегодишното девојче кое беше пријавено за исчезнато на 26 март годинава
Вишото јавно обвинителство во Зајечар поднело обвинение против тројца осомничени за убиството на двегодишната Данка Илиќ кај градот Бор во источна Србија, јавуваат српските и регионалните медиуми.
Како што соопштиле од Обвинителството, за случајот се обвинети Дејан Драгијевиќ и Срѓан Јанковиќ, кои се товарат за кривичното дело тешко убиство во соизвршителство. Третиот обвинет е таткото на Дејан, Радослав Драгијевиќ, кој според Обвинителството ги сторил кривичните дела непријавување на делото и помагање на сторител по извршување кривично дело.
Данка Илиќ исчезна на 26 март околу 13:45 часот во Бањско Поље кај Бор. Кога исчезнала, била со своите мајка и брат, и оттогаш ѝ се губи секаква трага. Поради нејзиното исчезнување, по првпат во Србија беше активиран системот „Најди ме“ (Amber Alert).
Во потрагата по Данка, српското Министерство за внатрешни работи го организира еден од најобемните претреси, во кој беше вклучен целиот регион. Специјализирани екипи на Министерството за внатрешни работи на Србија ја пребаруваа околината на куќата, а беше претресена и дива депонија на стариот пат. Исто така, се претресуваа и куќите на оние лица што имаат имот, но не живеат во местото. Беа вклучени и хеликоптери и дронови со термални камери, а потрагата беше проширена и надвор од границите на земјата.
Тогашниот министер за внатрешни работи на Србија, Братислав Гашиќ, на прес-конференција во април рече дека осомничените кои биле вработени во јавното претпријатие „Водовод“ во Бор со автомобил го удриле девојчето, по што го ставиле во багажникот на возилото, а потоа го фрлиле на депонија. Според Гашиќ, двајцата сега обвинети, на 26 март биле на службена должност во Бањско Поле.
Полицијата тогаш соопшти дека двајцата осомничени за убиството во целост го признале делото, но во јули Вишото јавно обвинителство во Зајечар соопшти дека едниот од нив негирал дека го сторил кривичното дело.
Исто така, од истото Обвинителство претходно соопштија дека од службеното возило на јавното претпријатие, во кое според истрагата биле двајцата осомничени кога го удриле девојчето, биле подигнати над 500 траги, но ниту една не се совпаднала со ДНК-профилот на двегодишното девојче.
„Досега вештачењата покажаа дека нема трага од ДНК на Данка Илиќ, како во самиот автомобил така и на надворешните делови на возилото“,
соопшти Обвинителството во јули, потсетува регионалниот сервис на Радио Слободна Европа (РСЕ).
Во текот на истрагата, покрај таткото на Дејан Драгијевиќ, беше уапсен и неговиот брат, Далибор. Тој почина на 7 април во Полициското одделение во Бор каде што беше спроведен на издржување 48-часовен притвор. Далибор Драгијевиќ, како што потсетува српската телевизија Н1, беше осомничен дека му помогнал на брата си да го премести телото на девојчето од депонијата и да го сокријат на друга засега непозната локација во околината на Бор.
Српските истражни органи сè уште не го пронајдоа телото на двегодишната Данка Илиќ.