Путин сè почесто напаѓа цивилни цели. Но, ќе пропадне. Тој не успеа и претходно и многу е важно тој и сите други да видат дека претседателот Зеленски и јас сме обединети. Ќе ја поддржуваме Украина се додека постои Украина, рече Бајден на прес конференцијата по средбата со Зеленски во Белата куќа
Денеска објавувам нов пакет на нашата безбедносна помош за Украина, изјави американскиот претседател Џо Бајден на прес конференцијата во Белата куќа по средбата со украинскиот претседател Володимир Зеленски.
Бајден додаде дека пакетот помош вклучува 1,85 милијарди долари „што вклучува директен транспорт на опрема во Украина, како и договори за набавка на муниција, што ќе и треба на Украина во наредните месеци”.
„Пакетот го вклучува ракетниот систем ‘Патриот’,
додаде Бајден.
Зеленски го оцени американското испраќање „Патриот“ во Украина како „важен чекор за создавање безбеден воздушен простор над Украина“ и дека тоа „значително“ ќе ја зајакне одбраната на земјата.
Претседателот Бајден рече дека Путин сè почесто напаѓа цивилни цели.
„Ќе пропадне. Тој не успеа и претходно и многу е важно тој и сите други да видат дека претседателот Зеленски и јас сме обединети. Ќе ја поддржуваме Украина се додека постои Украина“,
рече Бајден.
Претседателот Џо Бајден ги повика Американците и светот да продолжат да го поддржуваат Киев и во 2023 година.
Украинскиот лидер повторно го повика американскиот Конгрес да одобри дополнителни средства, велејќи дека сето тоа „ќе оди кон зајакнување на нашата глобална безбедност“.
Бајден вели дека тој и Зеленски биле во близок контакт од почетокот на војната, но дека било „особено добро да се сретнат лично и да се погледнат во очи“. Бајден рече и дека оваа средба се одржува во време кога рускиот претседател Владимир Путин ги „ескалира своите брутални напади“ врз Украина.
„Страшно е тоа што го прави Путин. Украина ја доби битката кај Киев, битката кај Харков, Херсон. Украина на секој чекор им пркоси на очекувањата на Русија“,
рече Бајден.
Бајден рече дека Русија намерно ја напаѓа критичната инфраструктура и додаде дека Владимир Путин „нема намера да ја запре оваа сурова војна“.
Бајден најави и 45 милијарди долари помош за Украина.
„Ќе останеме со вас колку што е потребно, нема да бидете сами. Не се сомневам дека заедно ќе ја одржиме светлината на слободата жива“,
рече Бајден.
Зеленски на почетокот на прес конференцијата рече дека тоа е историска посета. Тој им се заблагодари на Бајден и на меѓународните сојузници за нивната помош, како и на помошта со „Патриот“.
„Тоа е многу важен чекор што значително ќе ја зајакне воздушната одбрана на нашата земја“,
рече тој.
Зеленски додаде дека е убеден оти Украина ќе продолжи да ја има поддршката од САД, без оглед на промените во американскиот Конгрес.
„Разговаравме за спротивставување на теророт од Русија, нивното уништување на нашата енергетска инфраструктура, мораме да ја преживееме оваа зима. Ова е клучно хуманитарно прашање за нас. Разговараме за санкции и правен притисок врз терористичката земја Русија“,
рече Зеленски.
НАТО и Европската унија, додаде тој, никогаш не биле пообединети за ниту едно прашање и не гледам знаци за тоа да се промени.
„Путин мислеше дека ќе ослабне НАТО, наместо тоа, тој го зајакна НАТО. Произведе пообединета Европа“,
рече Бајден додавајќи дека се чувствува многу добро поради солидарноста за Украина.
Зеленски, одговарајќи на прашањето како замислува „праведен мир“ рече дека за него, како претседател, праведен мир не може да биде компромис за суверенитетот, слободата и територијалниот интегритет на земјата, компензација за целата штета предизвикана од руската агресија.
„Колку подолго трае војната, колку подолго трае оваа агресија, толку повеќе родителите ќе живеат за одмазда. Не може да има праведен мир во војната што ни е наметната“,
рече Зеленски.
Зеленски рече дека неговата земја, заедно со оние кои ја поддржуваат Украина, се бори за победа против тиранијата.
„Ние се бориме за нашата заедничка победа против оваа тиранија. Ова е вистински живот и ние ќе победиме“,
рече тој.
Зеленски додаде дека Украина и нејзините сојузници споделуваат заеднички вредности и поглед на животот.