Претседателката на Државната комисија за спречување на корупцијата, институцијата која ја изработи, ја претстави како прв документ од областа на борбата против корупцијата што се усвојува на највисоко ниво
Собраниската расправа за Националната стратегија за спречување на корупцијата и судирот на интереси за 2021-2025 ќе продолжи утре, откако попладнево, седницата беше прекината.
Утрешното продолжение е договорено на координацијата со претставниците на пратеничките групи.
Пратениците од опозициската ВМРО-ДПМНЕ, во текот на денешната расправа рекоа дека ќе го поддржат носењето на Стратегијата, бидејќи е важна за евроинтеграциите, но изразија сомнеж во капацитетот на власта за нејзино спроведување.
За пратениците од власта, пак, ова е вистинска стратегија во вистинско време, а нејзината имплементација зависи од сите.
Претседателката на Државната комисија за спречување на корупцијата (ДКСК), институцијата која ја изработи петгодишната стратегија, Билјана Ивановска ја претстави како прв документ од областа на борбата против корупцијата што се усвојува на највисоко ниво, и во неа се детектирани 12 секторски приоритетни проблеми – правосудството, медиумите, вработувањето во јавниот сектор, процесот на јавни набавки, спроведувањето на надлежностите во јавниот сектор…
Процесите и целите кои се наведени во Стратегијата треба да резултираат со континуирано намалување на корупцијата, а нејзината имплементација да испрати силна порака до македонското општество дека борбата против корупцијата конечно се остварува, рече Ивановска.