Министерството за надворешни работи и надворешна трговија изрази жалење за, како што посочи, повторните обиди на Бугарија за префрлање на одговорноста врз нашата држава од неисполнувањето на нејзините меѓународни обврски
Почитувањето и спроведувањето на одлуките на Европскиот суд за човекови права не се билатерални прашања, туку задолжителна обврска на секоја земја членка на Советот на Европа.
Ваква е реакцијата на Министерството за надворешни работи и надворешна трговија во врска со вчерашната изјава на МНР на Бугарија оти од страна на земјава било покажано недоволно разбирање на одлуките на Судот од Стразбур, кои, како што посочија, би можеле да се сметаат за мешање во внатрешните работи на Бугарија.
Македонското МНР изрази жалење за, како што посочи, повторните обиди на Бугарија за префрлање на одговорноста врз нашата држава од неисполнувањето на нејзините меѓународни обврски.
„Република Северна Македонија останува целосно посветена на владеењето на правото и почитувањето на човековите права и слободи како темелни вредности на европската интеграција и не може да прифати нивно негирање или релативизирање, вклучително и кога станува збор за правата на припадниците на македонското малцинство во Република Бугарија“,
наведуваат од МНР во писменото соопштение.
Дополнително, од Министерството нагласуваат дека земјава е максимално посветена на процесот на европска интеграција, процес кој, како што наведуваат, не треба да биде злоупотребен со воведување на дополнителни политички услови кои не се дел од Копенхашките критериуми. Во оваа смисла посочуваат дека политиката на условувања и неосновани обвинувања е непринципиелна пречка на евроинтегративниот пат на земјава и наместо градење добрососедски односи, создава непотребни тензии.
„Во оваа прилика силно се залагаме за развивање на пријателските односи меѓу двете држави и за решавање на сите отворени прашања преку рамноправен дијалог, одговорно однесување, заемна почит и разбирање. Очекуваме еднакво конструктивен пристап и од страна на Бугарија, заснован на целосно почитување на целите и принципите на Повелбата на ОН и правилата на меѓународното право, затоа што тоа е во интерес на нашите граѓани, во интерес на двете земји и во прилог на зацврстување на регионалниот мир, стабилност, безбедност и заедничката европска перспектива“,
додаваат од МНР.
МНР на Бугарија вчера оцени дека македонскиот премиер Христијан Мицкоски покажал недоволно разбирање на одлуките на Европскиот суд за човекови права и на тој начин, сакајќи или несакајќи, промовирал манипулативни и лажни тези кои би можеле да се сметаат за мешање во внатрешните работи на Бугарија.
На изјавите на бугарското МНР претходно денеска реагираше и премиерот Христијан Мицкоски кој рече дека директно мешање во внатрешните работи на една независна држава е всушност, промената на Уставот.