Шефот на дипломатијата на ЕУ, Жосеп Борел и американскиот државен секретар Ентони Блинкен ја повториле нивната целосна поддршка за процесот на проширување на Унијата кон Западниот Балкан со цел „зајакнување на демократските институции, заштита на темелните права и унапредување на владеењето на правото“.
Како што пренесе МИА од Брисел, на средбата меѓу Борел и Блинкен, која се одржа минатата недела во Вашингтон, се зборувало дека интеграцијата на регионот во ЕУ ќе придонесе за стабилноста и просперитетот на Западниот Балкан.
„Во овој контекст истакнуваме дека преговорите за членство со Албанија и Северна Македонија треба да започнат без одлагање“,
се вели во соопштението од средбата.
Двајцата дипломати се осврнале и на ситуацијата помеѓу Косово и Србија, за кои единствено решение, според нив, е дијалогот под водство на ЕУ.
„По неодамнешните тензии на северот на Косово ги охрабруваме двете страни да се ангажираат во постојана и одржлива деескалација и да избегнуваат дела кои ја загрозуваат стабилноста“,
порачуваат Борел и Блинкен.
Изразиле поддршка за борбата против корупцијата на косовските власти, но и дека секакво насилство кон цивили, новинари, полицајци и други власти е неприфатливо.
Што се однесува до Црна Гора, ЕУ и САД бараат сите политички сили да соработуваат за да ја задржат ориентацијата што ја бара црногорскиот народ и да продолжат со остварување на ЕУ реформите.
Конечно за Босна и Херцеговина, Брисел и Вашингтон ја повториле нивната цврста заложба за заштита на територијалниот интегритет на оваа земја.
„Сериозно сме загрижени за сѐ пополаризираната реторика во БиХ. Ги повикуваме сите страни да ги почитуваат и штитат државните институции, да се вратат на конструктивен дијалог и да преземат чекори за напредок на патот кон ЕУ интеграција, вклучително и во релевантните реформи“,
се вели во соопштението.
ЕУ и САД им стојат на располагање на властите во БиХ за да им помогнат во преземање на тие чекори, порачаа Борел и Блинкен.