Исламот не ги негира и не ги отфрла здравите научни принципи. Напротив, ги подржува и придонесува со векови за унапредување на тие принципи, порача поглаварот на Исламската верска заедница (ИВЗ), Сулејман Реџепи по повот постот за светиот месец Рамазан.
Во видео обраќањето тој порача дека џамиите ќе работат, но повика сите посвети да се прават во домовите и да се почитуваат препораките за пандемијата.
„Апелирам и ве замолувам да се придржувате кон исламските принципи за вашето и за здравјето на другите луѓе околу вас, истовремено почитувајќи го тоа што го велат лекарите и експертите во врска со пандемијата ковид 19. Само така ќе победиме и ќе се вратиме на нашите животи, само така ќе бидат оправдани нашите молитви за спас што ги упатуваме на семоќниот Алах“,
вели Реџепи.
За разлика од ваквиот апел кој е упатен денес, пред две недели реисот Реџепи при гостување во телевизиска емисија им порача на вицепремиерот Бујар Османи и на Владата дека ако не ѝ помогнат на ИВЗ, таа ќе ја повлече забраната за собири и тогаш нема да има сила што ќе може да се бори против епидемијата со коронавирусот, па ќе станеме Бангладеш.
„Јас го побарав нашиот дел, Владата да биде внимателна што прави, имаме повратен одговор во кој се вели дека барањето е прифатено и дека е испратено на разгледување во секторот за финансии на Министерство за економија. Денеска побарав од генералниот секретарот Мирсад Јакупи да контактира со Бујар Османи, кој е член на кризниот штаб и вицепремиер, дали има нешто? Тој вели дека досега нема ништо. Ќе ги потсетам малку поинаку, со писмо, затоа што не дај Боже ние да ги суспендираме одлуките, нема сила што ќе може да се бори против епидемијата, ви гарантирам, тогаш тука ќе стане Бангладеш“,
рече Реџепи пред две недели во верска емисија на ТВ Глоби, која се пренесуваше и на Фејсбук.