Владата денеска ја испратила оставката на Милевски со Собранието, но оттаму информираат дека дополнително ќе известат на која седница ќе биде констатирана оставката на министерот
Централниот одбор на Либерално-демократската партија (ЛДП) и официјално го прифати предлогот на Извршниот одбор Ристо Пенов да биде министер за локална самоуправа во владата на Димитар Ковачевски, но досега во Собранието не е пристигнат предлог за избор на нов министер во овој ресор
По ресичи 15 дена откако министерот за локална самоуправа Горан Милевски ја поднесе својата оставка до Владата, таа денеска е доставена до пратениците во Собранието.
Владата денеска ја испратила оставката на Милевски со Собранието, но оттаму информираат дека дополнително ќе известат на која седница ќе биде констатирана оставката на министерот. Нова седница во Собранието е закажана за 17 октомври.
Министерот за локална самоуправа Горан Милевски поднесе оставка до Владата на 20 септември, а повлекувањето од позицијата, како што информира, е од лични причини.
Досега во Собранието не е пристигнат предлог за избор на нов министер за локална самоуправа.
Пред два дена централниот одбор на Либерално-демократската партија (ЛДП) и официјално го прифати предлогот на Извршниот одбор Ристо Пенов да биде министер за локална самоуправа во владата на Димитар Ковачевски, на местото на лидерот на партијата Горан Милевски.
Поранешниот градоначалник на Скопје, Пенов, минатата недела за „360 степени“ потврди дека по консултациите претходните денови решил да и се врати активно на политиката и да го води ресорот што ѝ припаѓа на неговата матична Либерално-демократска партија.
Доаѓањето на Пенов на министерската функција ќе биде негово враќање на политичката сцена по повеќе од 10 години. Тој е роден на 28 септември 1957 година во Велес, а првата висока функција што ја извршуваше беше градоначалник на Скопје. На функцијата тој се задржа во два мандата (1996-2000 и 2000-2004), а потоа беше и пратеник, исто така во два мандата. Од партиски функции, пак, беше секретар на Демократската партија до нејзиното спојување со Либералната партија во 1997 г., а потоа беше и потпретседател и претседател на Либерално-демократската партија во периодот од 1999 до 2007 година.