Протестот поради незадоволството од откупните цени, како што најавија лозарите од Тиквешко, ќе се одржи на влезот во Неготино од страната на автопатот Скопје – Гевгелија и ќе трае од 10 до 15 часот претстојниов викенд
По протестот на оризопроизводителите од Кочанско, и лозари од тиквешкиот регион најавија дека претстојниов викенд ќе излезат на предупредувачки протест затоа што не се задоволни од откупните цени.
Протестот, како што велат, ќе се одржи на влезот во Неготино од страната на автопатот Скопје – Гевгелија и ќе трае од 10 до 15 часот во сабота и недела.
„Со тоа ќе го изразиме својот револт од незадоволителните цени кои пред претстојниот гроздобер ги нудат најголемиот дел од винарските визби. Очекуваме нашиот глас да го слушнат откупувачите и надлежните во државата кои се посредници помеѓу лозарите и винариите. Се надеваме дека ќе наидеме на разбирање и дека првично објавените цени ќе се корегираат“,
рекоа организаторите на протестот.
Според нив, најголем дел од винариите повторно манипулирале со тоа што нуделе помалку пари за килограм грозје, доколку исплатата ја извршат веднаш по откупот.
Вчера, со блокада на патот Штип-Кочани кочанските оризопроизводители излегоа на протести, незадоволни од, како што велат, ниската откупна цена на белиот ориз и на оризова арпа.
Оризопроизводителите од Кочанско протестираа со барање да се одреди откупната цена пред да почне жетвата, а побараа и средба со премиерот Димитар Ковачевски и министерот за земјоделство, шумарство и водостопанство, Љупчо Николовски.