Министерот за надворешни работи истакна дека оваа поддршка произлегува од Стратешкиот дијалог што двете земји го почнаа на почетокот на јуни минатата година. Османи на заедничката прес-конференција со американската амбасадорка во земјава Аџнела Агелер посочи и дека очекува акцискиот план што произлегува од Стратешкиот дијалог да биде усвоен утре од Владата
Како досегашни примери за ваквата соработка ги посочи финансиската помош и обуката на луѓето во правосудниот сектор, односно судиите и обвинителите, а последно во рамките на таа соработка е најавената листа на санкции
Листата на санкции, која треба да произлезе од работата на американскиот тим што неодамна престојуваше во земјава и каде што според очекувањата и најавите можно е да се најдат и актуелни функционери, е дел од поддршката што САД ѝ ја даваат на земјава за справување со корупцијата, изјави денеска шефот на дипломатијата Бујар Османи.
Министерот за надворешни работи истакна дека оваа поддршка произлегува од Стратешкиот дијалог што двете земји го почнаа на почетокот на јуни минатата година.
Османи на заедничката прес-конференција со американската амбасадорка во земјава Аџнела Агелер посочи и дека очекува акцискиот план што произлегува од Стратешкиот дијалог да биде усвоен утре од Владата.
„Рамката која го дефинира односот меѓу САД и Северна Македонија е Стратешкиот дијалог и акцискиот план што произлегува од него. Таму во тој Стратешки дијалог, во таа рамка, во тој акциски план, највидно место зазема заедничката соработка со САД во делот на борбата против корупцијата. Така што, тоа е во рамки на договорена платформа за соработка помеѓу САД и Република Северна Македонија и секоја нивна поддршка е добредојдена и сме благодарни за тоа. Меѓутоа, останува на САД да одлучат на кој начин ќе ја дадат таа соработка“,
рече Османи одговарајќи на новинарски прашања на прес-конференцијата на која ги презентираше приоритетите и целите на претседавањето на С Македонија со Јадранската повелба.
Како досегашни примери за ваквата соработка тој ги посочи финансиската помош и обуката на луѓето во правосудниот сектор, односно судиите и обвинителите, а последно во рамките на таа соработка е најавената листа на санкции.
„Таа поддршка САД ја дадоа минатата година на пример веднаш по започнување на Стратешкиот дијалог со финансиска поддршка, дополнителни милиони евра за правосудството, преку експертска помош, односно обука на луѓето кои се вклучени во правосудството, еве најава и преку листа на санкции и како што реков тоа е во рамки на договорена соработка и ние тоа го сметаме како добредојдено и во интерес на развојот на демократијата и владеењето на правото во Република Северна Македонија“,
рече Османи.
За повеќе детали околу ова прашање, додаде тој, треба да информираат САД.
Американскиот тим за санкции во земјава пристигна на почетокот на декември минатата година.
За него и за неговите цели, информираше американската амбасадорка во земјава, Агелер, која во објава на Твитер соопшти дека тимот дошол во Скопје за поагресивно да истражува корупција кај поранешни, но и кај актуелни функционери.
„Тимот за санкции од Вашингтон е тука за поагресивен поглед на минатите и сегашните корумпирани актери и да ги разгледа сите можни одговори. На правосудниот сектор во Северна Македонија му требаат повеќе истраги и гонење за да се покаже дека никој не е над законот“,
објави Агелер на 6 декември.
Премиерот Ковачевски и вицепремиерката задолжена за добро владеење Славица Грковска во изјави за медиумите рекоа дека не се сретнале со американскиот тим за санкции и затоа не можат да кажат детали во однос на нивната работа. Тие исто така информираа и дека Владата немала одлука да повика тим за санкции од САД.
Повеќе информации за работата на американскиот дојдоа од претседателот на државата, Стево Пендаровски, кој во гостување во емисијата „Само интервју“ на Канал 5 ТВ на 22 декември откри дека тој се состоел од тројца дипломати од Стејт департментот кои собирале информации за виталните сфери во општеството.
„Знам само неколку работи бидејќи не можам и не треба повеќе да изнесувам. Стануваше збор за тројца дипломати во Стејт департмент кои беа тука во мисија на собирање информации што се случува на политичката сцена, во бизнис сферата и во правосудството. Во виталните сектори на општеството. Од аспект на тоа утре, задутре, да ја дополнат таа т.н. црна листа или како се нарекува официјално лица и ентитети кои се под санкции на Америка“,
рече Пендаровски.
Според неговите информации, веројатно веќе е утврдено со кои лица САД би ја прошириле „црната листа“, и вели дека на неа може да се најдат и актуелни функционери.
Дека на листата можат да се најдат и имиња на актуелни функционери не исклучи ниту премиерот, Димитар Ковачевски, прашан за коментар токму на информациите што во јавноста ги изнесе Пендаровски.