По лавината негативни реакции за извидничкиот камп во близина на Скопје, на кој имало непримерни активности, од Град Скопје објавија дека го раскинуваат договорот откако претходно се појавија информации дека проект на Првиот скопски извиднички одред бил финансиран и од градскиот буџет.
Градските власти велат дека се шокирани и оти во проектната документација што стигнала кај нив немало никакви информации за спорните активности.
„Град Скопје се оградува од активностите на Првиот скопски извиднички одред кои предизвикаа реакции во јавноста. Сакаме да информираме дека во проектната документација доставена до нас ја нема наведено спорната активност ниту имаат доставено каква било информација која би укажала на одржување на истата. Дополнително, учесниците на настанот учествувале во приватна режија и не биле организирани од училиштата. Имајќи предвид дека настанот кој се случил предизвика лавина негативни реакции во јавноста и нѐ шокираше и нас како институција, Град Скопје го прекинува договорот со Првиот скопски извиднички одред“,
соопштија од Град Скопје.
Оттаму додаваат дека ја споделуваат загриженоста и осудите од стручните лица и од општата јавноста и се согласуваат дека сексуалното образование не може да се спроведува од ентузијасти, туку исклучиво од професионалци во областа.