Вонредниот надзор покажал дека од 107 пациенти, 38 се на возраст од 68 до 88 години
Државниот санитарен и здравствен инспекторат (ДСЗИ) утрово извршил вонреден инспекциски надзор во ГОБ „8 Септември“ за утврдување на возраста на пациентите хоспитализирани таму откако на социјалните мрежи и во медиумите се објави информација дека наводно пациент кој требало да се хоспитализира во ковид-центарот во таа болница бил вратен поради неговата возраст.
Како што соопштија од Министерството за здравство, Инспекторатот утврдил дека во болницата има 107 хоспитализирани лица, од кои 38 се на возраст од 68 до 88 години.
Според директорот на „8 Септември“, Христијан Костов, пациент не може да биде вратен, туку единствено може да биде препратен во друг ковид-центар доколку таму немало слободно место, но тврди дека додека пациентот чека да биде пренесен во друга болница, му се прават потребните анализи и со амбулантно возило се носи во ковид-центар каде што има слободен кревет за да биде хоспитализиран.
Од Министерството за здравство посочуваат дека денешниот надзор е направен по барање на министерот Филипче, при што се потенцира дека хоспитализацијата во ниту еден случај не зависи од возраста, односно секој пациент, без разлика на колку години е, има подеднакво право на болничка нега и третман.