Финалето во Келн не беше завршено, неизвесноста дали Вардар ќе застане на европскиот трон траеше, но скопјани како да претчувствуваа дека итањето кон централниот плоштад нема да биде попусто. Така и беше.
Плоштадот беше обоен во црвено-црно, а оние што немаа навивачки реквизити, можеа да ги купат на лице место. Вистински делириум завладеа кога вардарци во Келн го кренаа победничкиот пехар.
Доминантното чувство на радост, сепак, не успеа да ја сокрие грижата за иднината на клубот по неодамнешните најави од сопственикот Сергеј Самсоненко дека не може да го издржи финансискиот товар и дека ќе се повлече.
Еве што изјавија поддржувачите на Вардар.
„Вардар нема да згасне има иднина.“
„Големо срце, без пари да играш повеќе од една сезона тоа само Вардар може. Никој друг.“
„Ако дојдат нови дечки како што беа сега овие мислам дека да. Ќе биде тешко, но со нивно срце може се.“
„Ако се игра од срце може да се постигне и без пари.“
„Ништо чудно и во наредните години, зависно од буџетот повторувам, сепак зависи, да може да се случи Вардар да биде она што е и сега, без некои подрастични осцилации. Можеби не освојување на Лига на шампиони меѓутоа, меѓу првите 5-6 екипи во секој случај“
„Тие што најавија ќе си одат, но поголемиот дел од тимот ќе остане. Костурот на тимот ќе остане.“
„Дали сме подготвени за следна титула? Апсолутно, зошто да не? И оваа година бевме аутсајдери ама сепак сме шампиони. Што е побитно од тоа? Не можеш да уништиш нешто што не умира.“
Неизвесната иднина на Вардар е реалност што ги мачи и играчите. Дел веќе потпишаа за други клубови, но дел, како Тимур Дибиров, се уште ја чекаат разврската во Скопје.
– Ако по оваа титула никој не ни помогне да ја средиме ситуацијата, тогаш сите да ги соблечеме патиките и да ги завршиме кариерите. Ако некој остане рамнодушен по ова, тогаш не знам што да кажам – рече Дибиров.
Состојбата во која се наоѓаат Дибиров и колегите му е добро позната и на поранешниот репрезентативец Наумче Мојсоски. Вели – дел од играчите веќе заминаа, а други сериозно би размислиле дали да потпишат за Вардар, екипа која половина година не зема плата.
– Мора спонзорите кои сакаат да помогнат, мора некако да добијат од државата или не знам од Агенција за млади и спорт некоја олеснителна околност. Што ти ако дојдеш како добар бизнисмен да дадеш во Вардар милион евра, а знаеш дека си ги фрлил во бунар и дека ништо повратно нема. Јас не велам да заработиш, но барем да ти олесни државата на твојата фирма, на нешто. Само така може да ги стимулираме големите компании да дојдат и да помогнат. Ова не е фудбал, каде ќе направиш некој играч и ќе го продадеш 10- тина милиони евра – ни изјави Наумче Мојсоски.
Слично размислува и поранешниот сопственик на европскиот женски ракометен првак Кометал Ѓорче Петров, Трифун Костовски. Бара стимул за бизнисот да има интерес за инвестирање во спортот.
Потребни се реформи. Реформи во кои ќе почнат ослободување од одредени давачки, па дури нека се зголемат одредени давачки кај фирмите кои што работат позитивно, со цел да ги усмерат средствата точно дали во спортот дали во културата, односно сето тоа што е надградба. Верувајте уморен сум од тоа што слушам дека државата треба да даде. Државата прво ни зема за да може да ни даде – вели Костовски.
Првиот човек на Ракометната федерација, Живко Мукаетов, се залага за комбиниран модел – со олеснувања на фирмите што потенцијално би спонзорирале, но и со, како што вели, радикална помош од државата.
– Потребна е стратегија и концепт, ако се направи анализа на најголемите клубови во континуитет, или се тоа државни проекти како Веспрем или се тоа клубови кои имаат спонзори кои инвестираат средства и се свесни дека тоа се неповартни пари. Како држава мора да воспоставиме критериуми и да се одвојуваат за тој врвен спорт. Конкретно не сме загрижени само за тоа дали ќе се обезбеди една финансиска основа за продолжен континуитет на еден така јак Вардар, ние конкретно не сме среќни и со ситуацијата на еден Металург, кој е базата на македонските ракометни репрезетанции во моментот – објаснува Мукаетов.
Може ли големиот успех, сепак, да го предомисли сопственикот Самсоненко? Тој уште синоќа како да навести такво нешто, прашувајќи – зошто сите зборуваат за некаков крај на Вардар?