Спасувачите претпоставуваат дека второто лице вчера се вклучило во потрагата и сакало да помогне во спасувањето на туристот што исчезна пред една недела. Акцијата на извлекување на телата може да трае и 20 часа
По една недела потрага, под врвот Вихрен на планината Пирин во Бугарија е пронајдено телото на туристот Пламен Христов (69), кој се водеше за исчезнат, јави бугарскиот порталот „24 часа“.
На неколку метри од него пронајдено е тело на уште машко лице кој навидум има 60-70 години, но тој сè уште не е идентификуван.
Во досегашниот обид за идентификација, проверено е дали има пријавено исчезнати лица од Сандански, Банско и околината, а според наводите во бугарските медиуми се проверува и според евиденциите во хотелите.
Спасувачите претпоставуваат дека телото на второто лице е некој што веројатно вчера тргнал да го бара исчезнатиот Христов и се обидел да му помогне.
Воен хеликоптер од марката „Кугар“ правеше увид на теренот за да процени дали може да се вклучи во операцијата на извлекување на загинатите.
Последните информации се дека се прави организација да се испрати тим од уште дваесетина спасувачи од Благоевград, Ќустендил и Софија со оглед дека првичните очекувања не биле дека ќе треба да се извлекуваат две тела.
Според најавите, со оглед на непристапниот терен, акцијата на извлекување може да трае и 20 часа.