Ова е повторно судење во тетовскиот Основен суд откако Апелацискиот суд во Гостивар укина дел од првичната пресуда
По година и пол затвор добија поранешните директори на тетовската Клиничка болница, Флорин Бесими и Артан Етеми, во врска со пожарот во модуларната болница, во кој загинаа 14 луѓе.
Клиничката болница, пак, како правно лице е одговорна за кривичното дело предизвикување на општа опасност и повторно е казнета со парична казна од од еден милион денари, како што беше и во првичната пресуда донесена од Основниот суд во Тетово.
Имено, денешната пресуда е исходот од повторно судење во тетовскиот Основен суд откако Апелацискиот суд во Гостивар укина дел од првичната пресуда.
Во своите завршни зборови, Обвинителството наведе дека доказите понудени во текот на судењето потврдиле дека двајцата директори не поставиле противпожарни апарати во објектот и со тоа сториле тешки дела против општата сигурност. Јавниот обвинител побара двајцата поранешни директори на болницата во Тетово да бидат прогласени за виновни.
Адвокатите на Флорим Бесими и Артан Етеми побараа нивните клиенти да бидат изземени од обвинението, тврдејќи дека не носат никаква одговорност за противпожарниот систем во болницата.
Правните застапници на семејствата на жртвите побараа тетовската болница да биде прогласена за виновна и на семејствата да им се признае правото на обесштетување. Нагласија и дека семејствата на жртвите се чувствувале игнорирани во текот на целиот судски процес. Изразија и незадоволство од текот на судењето бидејќи, како што додаваат, причините за пожарот сè уште не се откриени.
Судијата Реџеп Муса денеска, сепак ги прогласи за виновни ексдиректорите на Клиничката болница за сторено кривичното дело тешки дела против општата сигурност по член 292 став 4 во врска со член 288 став 4 во врска со став 2 во врска со член 22 од Кривичниот законик.
„Правно лице ЈЗУ Клиничка болница Тетово одговорно е за сторено кривично дело предизвикување општа опасност по член 288 став 5 во врска со став 4 и во врска со став 2 од Кривичниот законик. Судот, Флорин Бесими и Артан Етеми ги осудува на ефективна казна затвор од траење од една година и шест месеци, судот правното лице го осудува на парична казна од еден милион денари да ја плати по 30 дена од правосилност на пресудата“,
наведе при читањето на пресудата судијата Муса, пренесе СДК.мк.
Од денешната пресуда, како што пренесе порталот, незадоволни се и обвинетите и семејствата на загинатите и повредените во пожарот во модуларната болница.
„Да одиме по математика, да ги ставиме тие 14 жртви, тоа изнесува по еден месец затвор за секој загинат. Ние не сме задоволни од ваквата пресуда и ќе продолжиме натаму со жалба. Пред судот требаше да дојдат и министерот Филипче, Анѓушев, фирма Брако, инсталацијата на струјата што ја ставаа во модуларната. Тие треба да бидат виновни за оваа трагедија, ама државата одлучи Флорим Бесими и Артан Етеми да бидат казнети една година и шест месеци. Не викам дека немаат вина и кај нив, ама вината е погоре“,
изјави Мумин Исмаили, член на оштетено семејство.
И обвинетиот Флорим Бесими смета дека ваквата пресуда не е праведна, бидејќи не била докажана неговата вина во случајот.
Според него ова не било судење за да се открие вистината, ниту да се најдат виновниците за оваа трагедија, како и да се одговори на прашањата зошто настанал пожарот, кој е одговорен за изградба на објектот што изгоре и кој дозволил животите на луѓето да бидат ставени во опасност.
„Не, ова судење се претвори во склоп на вина, против оние што ниту имале моќ ниту одговорност за оваа трагедија. Мене ме обвинија за недостаток на противпожарни (ПП) апарати, а во постапка докажавме дека имало противпожарни апарати, иако гледате дека не сум се потпишал на ниеден документ за таков објект, но тоа не го зедоа во предвид. Ова е навистина неправда, иако некои од сведоците тврдеа дека имало ПП апарати иако ние со очи видовме дека тој пожар не можеше да се изгасне со ниту еден рачен ПП апарат. Ова е бегање од вистината, јас не барам милост, јас барам правда за жртвите и за себе. Барам вистина да излезе на виделина, семејствата на жртвите не заслужуваат погрешно објаснување и лажен виновник. Тие заслужуваат да ја знаат вистината“,
изјави Флорим Бесими.
Ваквата одлука Апелацискиот суд во Гостивар ја донесе постапувајќи по жалбите на обвинетите, а во која утврдил дека првостепената пресуда на Основниот суд во Тетово е нејасна, неразбирлива и неподобна за испитување.
Основниот суд во Тетово пресудата за пожарот во модуларната болница во која на 8 септември 2021 година изгореа 14 луѓе ја изрече на 5 јуни 2023 година.
Ова беше второ судење за случајот, а со претходната пресуда, тогашниот директор на Клиничката болница, Флорин Бесими, економскиот директор Артан Етеми беа осудени на условни казни, а болницата казнета со еден милион денари. Повисокиот суд ја укина пресудата, со што обвинетите се вратија во судница.
На 3 април годинава претставници на семејствата на жртвите од трагедијата во модуларната болница во Тетово, на прес-конференција пред тетовскиот Основен суд, побараа обнова на истрагата бидејќи, како што посочија, постојат сериозни докази за кои сметаат дека Обвинителството ги има отфрлено во досегашната постапка.
Тие воедно истакнаа дека се приклучуваат кон јавното писмо од „Иницијатива Нула“ до државниот јавен обвинител Љупчо Коцевски.
Семејствата на 14-те жртви бараат од обвинителството да ја обнови истрагата за да се откријат вистинските виновници за пожарот во модуларната болница во Тетово.
Модуларната болница во Тетово која беше отворена за згрижување и лекување пациенти болни од ковид-19 изгоре вечерта на 8 септември 2021 година, а во трагедијата животите ги загубија 14 лица. Од загинатите, 12 беа на болничко лекување, додека за двајца беше утврдено дека се членови на семејствата на дел од згрижените пациенти.