Институтот за физикална терапија и рехабилитација во скопската населба Капиштец работи без елаборат за животна средина, кој е обврзан законски да го поседува и затоа е задолжен во најкус можен рок да го изработи, соопшти Државниот инспекторат за животна средина кој вчера извршил контрола со инспекторите од Град Скопје и Дирекцијата за заштита и спасување.
Контролата е направена откако изминатите денови преку новата алатка за пријавување, велат, Инспекторатот добил многубројни претставки за емисиите во воздухот од оваа институција.
„Оџаците од котлите на мазут да се чистат редовно, согласно правилник во надлежност на Дирекцијата за заштита и спасување. Чистењето оџаци го подобрува согорувањето и го намалува загадувањето. За постапувањето со медицински отпад немаше забелешки. Исто така, неопходно е да се спроведат мерења на емисиите во воздухот од страна на акредитирана лабораторија и да се подобри одржувањето на котелот, кој е во видливо лоша состојба. По обезбедување финансиски средства во најитен можен рок, треба да се напушти горењето мазут и да се премине на природен гас, да се вградат сончеви колектори и да се подобри енергетската ефикасност“,
велат од Инспекторатот по извршената контрола.
Оттаму повторно повикуваат граѓаните да пријавуваат и најавуваат дека ќе продолжат со надзори во јавните институции.