Вкупно 80 милиони денари одобри Владата за спас на езерата во Дојран и Преспа. Како што информира владината прес-служба, средствата се одобрени на денешната седница.
„Владата одобри средства во износ од 40 милиони денари на Општина Дојран, за решавање на проблемот со состојбата на Дојранското Езеро и 40 милиони денари на Општина Ресен, за решавање на проблемот со состојбата на Преспанско Езеро“,
се вели во соопштението.
Парите се одобрени од Буџетот за 2021 година. Пред самиот крај на претходната година, премиерот Зоран Заев најави дека ревитализацијата на Преспанското Езеро ќе се одвива во три фази.
Првата фаза, како што рече тогаш премиерот, опфаќа анализи, студии, препораки, средби на засегнатите страни, во голем дел е веќе спроведена, додека за следните две фази клучна ќе е иницијативата и кај соседите, па во таа насока ќе се бара трите земји да му дадат нова динамика и на проектот за комплетна заштита на Преспанското Езеро поддржан од Европската Унија.
Во рамките на втората фаза на ревитализација се предвидени и мерки за напредок на активностите за изградба на современи прочистувачи на сите отпадни води кои се влеваат во Преспанското Езеро.