Условот за добивање бонус е да се вакцинираат над 70 проценти од пациентите на еден лекар
Владата денеска усвои и предлози за финансиска поддршка за намалување на последиците предизвикани од пандемијата врз производството и откупот на земјоделски производи (јаболка, ориз и грозје)
По 30 денари за секој пациент кој ќе се вакцинира против ковид-19 ќе добијат матичните лекари, но условот е со вакцинацијата да бидат најмалку 70 отсто од пациентите евидентирани кај еден лекар.
Владата, на денешната седница, донесе одлука за еднократна финансиска награда во висина од 30 денари по пациент за матичните лекари, доколку достигнат и надминат опфат од 70 отсто со вакцинација на своите пациенти од вкупниот број запишани кај нив, соопштија од владиниот кабинет.
Оваа мерка, како што се посочува, е со цел стимулација на интересот за вакцинација за заштита од ковид -19 и за спречување на ширењето на пандемијата.
Владата денеска го утврди и текстот на предлог-законот за финансиска поддршка за намалување на последиците предизвикани од пандемијата врз производството и откупот на земјоделски производи. Како што се соопштува, нa предлог на Министерството за земјоделство, шумарство и водостопанство со ова законско решение се уредуваат условите, корисниците, висината како и постапката за доделување финансиска поддршка за намалување на последиците врз производството, откупот на јаболко и ориз предизвикани од пандемијата.
На оваа седница, Владата го утврди и предлог-законот за изменување и дополнување на Законот за финансиска поддршка за намалување на последиците предизвикани од пандемијата врз производството, откупот на грозје и винската индустрија со дополнување со нови корисници на финансиската поддршка.
–