Путин рече дека ќе ги подигне односите со Северна Кореја на повисоко ниво и вети безрезервна поддршка на таа земја, објави севернокорејската државна агенција КЦНА пред неговата посета
Рускиот претседател Владимир Путин денеска пристигна во својата прва посета на Северна Кореја по 24 години, ветувајќи дека ќе ги подобри трговските и безбедносните врски со земјата и дека ќе ја поддржи во односите со САД.
Руските државни медиуми објавија дека авионот со рускиот претседател слетал во Пјонгјанг околу 2 часот и 45 минути по локално време по кратко застанување на рускиот Далечен Исток.
Путин рече дека ќе ги подигне односите со Северна Кореја на повисоко ниво и вети безрезервна поддршка на таа земја, објави севернокорејската државна агенција КЦНА пред неговата посета.
Прашањето за односите со Украина
Во писмото објавено во севернокорејскиот весник „Родонг Синмун“, гласник на владејачката Работничка партија, Путин истакна дека во текот на изминатите 70 години двете земји развиле добри односи и партнерство засновани на еднаквост, меѓусебно почитување и доверба.
Путин ѝ се заблагодари на Северна Кореја за поддршката на руската специјална воена операција во Украина, како што Русија ја нарекува војната што ја започна пред две години, и вети поддршка за напорите на Пјонгјанг да ги брани своите интереси и покрај, како што напиша тој, „притисокот, уцените и воените закани од САД“.
Во пресрет на посетата, Путин најави дека сака да потпише сеопфатен договор за стратешко партнерство со Северна Кореја. Неговиот советник за надворешна политика, Јуриј Ушаков, рече дека договорот ќе вклучува безбедносни прашања. Ушаков додаде дека договорот нема да биде насочен против ниту една земја, туку дека ќе биде „план за идна соработка“.
Посетата ќе опфати приватни разговори меѓу двајцата лидери, гала-концерт, државен прием, почесна стража, потпишување документи и изјави за медиумите, рече Ушаков.
Во делегацијата се рускиот министер за одбрана Андреј Белусов, министерот за надворешни работи Сергеј Лавров, министрите за природни ресурси, здравство и транспорт, шефовите на Руската вселенска агенција и железници, како и главниот енергетски службеник, вицепремиерот Александар Новак.
Белата куќа изрази загриженост
Путин беше домаќин на севернокорејскиот лидер пред девет месеци на рускиот Далечен Исток. Тогаш не потпишаа никакви официјални договори.
Белата куќа вчера изрази загриженост поради зајакнувањето на односите меѓу Русија и Северна Кореја. Стејт департментот соопшти дека е „прилично сигурно“ оти Путин ќе побара оружје за војната во Украина. Москва и Пјонгјанг негираат трансфери на оружје, но ветија дека ќе ги зајакнат воените врски.
Северна Кореја е под санкции на ОН поради нејзината ракетна и нуклеарна програма од 2006 година, а овие мерки беа заострени со текот на годините.