Проценката на поранешниот претседател на Бугарија е дека по третите по ред парламентарни избори земјата ќе излезе од политичката криза, зашто, според него, граѓаните се изморени од избори во недоглед
Росен Плевнелиев е оптимист дека неизвесноста во Бугарија се ближи кон крај. Според поранешниот бугарски претседател, за два месеца во Софија ќе има политичка влада. Својата анализа Плевнелиев ја темели на фактот дека, како што вели, бугарските граѓани се уморни од избори во недоглед. Во интервју за емисијата ,,360 степени”, емитувано вечерва на ТВ Алсат, тој не ја исклучува можноста ГЕРБ на Бојко Борисов, и покрај силниот политички фронт против него, да биде дел од идната власт.
„Од 2006 година досега, веќе 15 години, ГЕРБ е водечката политичка сила во Бугарија, вклучувајќи ги и последните избори кои се спроведоа во 2021 г., ГЕРБ продолжува да биде прва политичка сила и покрај сериозните удари. Останатите партии се обединија околу тоа целосно да го елимираат ГЕРБ и од политичкиот живот и од власта, но нема како тоа да се оствари и покрај обединувањето на сите против ГЕРБ. Затоа, има две опции за во иднина – ГЕРБ ги има своите партнери, својата сила и можно е да формира коалициска влада, се разбира, откако ќе се види гласот на народот. Исто така, можно е ГЕРБ и да не учествува во идната влада, која кон крајот на ноември би ја формирале политичките опоненти на Бојко Борисов. Но, повеќе од јасно е дека Бугарите се изморија од избори и дека влада ќе има“,
вели Росен Плевнелиев во интервјуто за 360 степени.
Формирањето политичка влада се смета за предуслов за почеток на процес кој би довел до деблокада на пристапниот процес на Северна Македонија во Европската Унија. Бугарија го блокира усвојувањето на Преговарачката рамка и закажувањето на првата меѓувладина конференција со образложение дека Северна Македонија не го исполнува Договорот за добрососедство потпишан во 2017 година.