Освен победата на ВМРО-ДПМНЕ на парламентарните избори, хрватскиот премиер упати честитки и до новоизбраната претседателка Гордана Силјановска-Давкова
Хрватскиот премиер Андреј Пленковиќ во објава на социјалната мрежа Икс денеска на лидерот на ВМРО-ДПМНЕ, Христијан Мицкоски, му ја честита изборната победа на партијата на парламентарните избори во земјава.
„Честитки до Христијан Мицкоски на убедливата изборна победа на ВМРО-ДПМНЕ. Со нетрпение очекувам да продолжи одличната соработка меѓу Хрватска и Северна Македонија, чиј европски пат силно го поддржуваме“,
пишува премиерот на Хрватска во објавата на Икс.
Освен победата на ВМРО-ДПМНЕ на парламентарните избори, Пленковиќ упати честитки и до, како што напиша, новоизбраната претседателка Гордана Силјановска-Давкова.
Čestitke @HMickoski na uvjerljivoj izbornoj pobjedi @VMRO_DPMNE! Radujem se nastavku izvrsne suradnje Hrvatske i Sjeverne Makedonije, čiji europski put snažno podupiremo. Čestitam i novoizabranoj predsjednici ?? Gordani Siljanovskoj-Davkovoj. pic.twitter.com/CuFwkhEMeL
— Andrej Plenković (@AndrejPlenkovic) May 9, 2024
По редовните парламентарни избори во Хрватска на 17 април, Андреј Пленковиќ, инаку лидер на Хрватска демократска заедница (ХДЗ), вчера објави дека постигнал договор за формирање влада со крајно десничарското Татковинско движење. Пленковиќ ќе го добие третиот премиерски мандат по ред, а неговата влада би можела да биде одобрена во парламентот уште следната недела.
Инаку, според 99,82 отсто од обработените избирачи, претседателската кандидатка на ВМРО-ДПМНЕ, Гордана Силјановска-Давкова освоила 560 170 гласа на вчерашниот втор круг од изборите за шеф на државата. Нејзиниот противкандидат Стево Пендаровски, пак, вчера добил 251 541 глас.
На првиот круг од претседателските избори, што се одржа на 24 април, кандидатката поддржана од ВМРО-ДПМНЕ освои 363 085 гласа, а Пендаровски, кој е поддржан од СДСМ, 180 499 гласа.