Во последниот период, се почувствува опаѓање на дисциплината и кај полицијата и кај граѓаните. Можеби тоа беше испровоцирано од некои политички изјави, вели дополнителната заменик-министерка за внатрешни работи
Испраќањето на пораката „нема да казнуваме“, широко ја отвори вратата за оние кои не го почитуваат законот. Се почувствуваа заштитени од полицијата која треба да го чува редот во државата, рече вечерва дополнителната заменик-министерка за внатрешни работи Славјанка Петровска.
Во гостување на „Вин – вин“ на Телма, Петровска потенцира дека таа и министерот Наќе Чулев имаат дијаметралнто спротивни ставови кога се работи за однесувањето на МВР во услови на коронавирусот. Според неа, до оваа ситуација – на повторно воведување карантин, не доведе задоцнетата превентивна улога на полицијата и неприменувањето репресивни мерки. Не е фер, потенцира, казнувањето на едни граѓани, а не казнување на други, кои исто така сториле прекршок.
„Во последниот период, се почувствува опаѓање на дисциплината и кај полицијата и кај граѓаните. Можеби тоа беше испровоцирано од некои политички изјави. Министерот е оној што раководи со МВР и тој ја испраќа пораката за тоа како Министерството треба да биде позиционирано. Ако јас излезев со спротивна изјава, ќе требаше да имаме двојство. Ќе беше неодговорно ако поттикнев раздор во полицијата, а сега не е време, ниту место полицијата да служи за партиско поткусурување“,
нагласи Петровска.
Полицијата, додаде, не е тука за да им се допадне на граѓаните, туку да го штити законот.
„Улогата на полицијата е јасна, превентивна и репресивна. Репресивна кон оние кои не ги почитуваат законите“,
рече дополнителната заменик-министерка.
Во врска со полицајците кои завчера на приватен имот правеле забава, рече дека случајот веќе се процесира. Тоа што се случувало, како што оцени, не е во согласност со мерките и препораките, а нарушен е и угледот на МВР.
„Дел од нив не биле на задача, дел биле. Прекршиле многу правила, меѓу кои и прво, основно етичко правило: да се грижат за угледот на МВР. Се останото е констатирано и запишано, се процесира. Јас сум секогаш на страната на припадниците на МВР и сметам дека тие навистина треба да бидат наградени, што не значи дека поединци треба да го валкаат угледот на Министерството“,
рече Петровска.
Околу ограничувањето на правата на верниците, таа рече дека во овој момент нема ништо поприоритетно од заштитата на јавното здравје.
„Дисбалансот во размислувањата дали треба нешто да ограничиме доведе до неодлучност во постапувањето. Премногу долгото вагање на нештата доведе до овие последици. Инаку, ваков тип собирања, кои не соодвествуваат на препораките и мерките, се видлив во Скопје и од оваа страна, во Градски парк, Водно“,
истакна Петровска.