Покрај лице од обезбедувањето на Мицкоски, Петровска денеска ја прозва опозицијата и за другите инволвирани кои исто така се поврзуваат во ВМРО-ДПМНЕ
Скандалот со продажба на парцели во Делчево добива драстично поголема димензија која води директно до лидерот на ВМРО-ДПМНЕ, Христијан Мицкоски, обвини денеска пратеничката од СДСМ, Славјанка Петровска.
„Едно од вмешаните лица е и Влатко Илиевски, дел од обезбедувањето на Христијан Мицкоски. Ова е Договорот за купопродажба на Илиевски, телохранителот на Мицкоски, вреден неверојатни 500 000 евра! Го повикуваме Христијан Мицкоски да излезе пред граѓаните и да одговори: Каква е неговата поврзаност со овој скандал? Дали со негово одобрување и знаење е склучен овој договор? Дали разликата од препродажбата како црни пари завршиле во Белиот дворец за што постојат оправдани сомневања? Затоа ли брзавте да изгласате недоверба? За да го скриете овој скандал?“,
праша Петровска на прес-конференција.
Станува збор за случај за кој предистрага води Основното јавно обвинителство (ОЈО) Скопје и Финансиската полиција, а кој се однесува на тоа што лица купувале или добивале на подарок земјиште во Делчево, а потоа истите ги препродавале за 40 пати повисоки цени.
Покрај лице од обезбедувањето на Мицкоски, Петровска денеска ја прозва опозицијата и за останатите инволвирани кои исто така се поврзуваат во ВМРО-ДПМНЕ.
„Прашањето на кое одговор треба да даде истрагата е дали разликата од над 1,5 милиони евра завршила во нечии џебови или директно во Белиот дворец? Според информациите во медиумите се споменуваат повеќе имиња, сите поврзани со ВМРО-ДПМНЕ, како Игор Г., поранешен претседател на УМС на ВМРО-ДПМНЕ, Дарко Т., поранешен советник на ВМРО-ДПМНЕ, но и други лица“,
рече пратеничката.