Петровска ги повика граѓаните на Тетово да ја дадат поддршката на нејзините колеги бидејќи доаѓаат од иста партија и коалиција и, како што рече таа, во партијата од каде доаѓаат она што го ветиле го реализирале
Славјанка Петровска, министерка за одбрана и членка на Централниот одбор на СДСМ, денес во Тетово побара на изборите за Совет на општината, поддршка за советничката листа на СДСМ и коалицијата бидејќи, како што рече тоа е патот до европско Тетово.
„Два аргументи даваат најдобар одговор на прашањето зошто во Советот на градот треба да има што повеќе советници од СДСМ и коалицијата. Прво за да се запре она што не треба да се прави и да се поттикнат проекти кои се од корист за сите вас и второ за да поминат проектите за кои сите вие се согласувате дека му се потребни на градот, а градоначалникот не ги почнува или воопшто ги нема во својата програма. Такви се проектите за изградба на нов мултифункционален Спортски комплекс, и конечно Парк во Тетово затоа што тетовчани и тетовчанки тоа го заслужуваат“,
рече Петровска.
Петровска ги повика граѓаните на Тетово да ја дадат поддршката на нејзините колеги бидејќи доаѓаат од иста партија и коалиција и, како што рече таа, во партијата од каде доаѓаат она што го ветиле го реализирале.
„Вие сите знаете колку многу добија војниците од Тетово, вашите сограѓани кои застанаа во армискиот строј и ја чуваат нашата држава. Знаете дека Законот за служба во Армијата стоеше заглавен во Собранието повеќе од една година, блокиран од опозицијата, со решенија на кои сите припадници на Армијата меѓу кои и вашите сограѓани чекаа со нептрпение. Но, со посветеност и истрајност предложивме нов, уште подобар текст на Законот и тој се усвои во Собранието“,
додаде Петровска.
Според неа се што досега ветила е реализирано.
„На војниците и офицерите на кои минатите 4 години месечните приходи им пораснаа за повеќе од 50 отсто сега со Законот добија уште едно покачување, право на користење на средства од над 9 000 денари за станарина ќе има секој војник веднаш штом ќе стапи во редовите на Армијата, условите за пензионирање се уште поповолни, правото за исплата на отпремнина е износ од две просечни плати но не помалку од 1 000 евра за секоја година помината во Армијата. Сега секој војник кој и служел на државата ќе може да земе отпремнина од околу 20 000 евра“,
нагласи министерката Петровска.
Следната година, според неа, ќе се започне со реконструкција на објектите на тетовската касарна, а се подготвува и проект за Центар за обука во зимски услови на Попова Шапка.
„Ова е само мал дел од сето она што нашите војници и офицери го заслужуваат. Ова не се само зборови, ова се реални чекори. Затоа бидете уверени дека напредокот на Тетово, европско Тетово може да биде реалност само доколку советниците на СДСМ и коалицијата ја добијат вашата довеба и можноста да бидат вашиот глас во Советот и да ги спроведат своите идеи за доброто на Тетово – на дело“,
рече Петровска барајќи на 20 август граѓаните да гласаат за број 1, за европско Тетово.