Дополнителната заменичка министерка во МВР во техничка влада, Славјанка Петровска, го обвини акутелниот министер Наќе Чулев дека го прекршил Изборниот законик. Според неа, тоа го сторил со експресната постапка да го „казни“ својот советник кој нападна полициски началник во Тетово на денот на изборите.
Според Петровска, решението со кое Зоран Ѓорѓевски-Чикаш е суспендиран на само еден ден и вратен на работа со казна 15% од плата во следните шест месеци, воопшто не требало да биде донесено се до изборот на нова Влада.
„Скандалозното решение со кое Наќе Чулев го амнестираше својот советник е спротивно на Изборниот законик, член 8 а во кој се вели дека од денот на распишување до денот на завршување на изборниот процес не смее да се започне со постапка престанок на работен однос. Со оглед на тоа дека во случајов е сторено кривично дело за кое е поднесена кривична пријава и дисциплинската постапка може да резултира со отказ, таа не смеела да биде започната. Какви советници, такви одлуки“,
напиша Петровска на својот Фејсбук профил.
Со други зборови, Петровска сугерира дека доколку се почитувал член 8-а, став 1, алинеја 3 од Изборниот законик, тогаш дисциплинската постапка против Ѓорѓевски или не требала да почне или веднаш да биде ставена во мирување, бидејќи законот во тој дел предвидува дека до избор на нова Влада е забрането:
„Да се започне постапка за вработување на нови лица или постапка за престанок на работен однос во државни и јавни институции, а започнатите постапки се ставаат во мирување, освен во случаи на итни и неодложни работи“,
пишува во член 8-а, став 1, алинеја 3 на Изборниот законик.
Доколку се остане на јавна преписка, најголем ќар од целата ситуација ќе има „казнетиот“ советник на Чулев. И покрај физичкиот напад врз началникот на сообраќајната полиција во Тетово, тој ќе си остане во работа и тоа токму во истиот град каде го нападна својот колега бидејќи од таму дојде во кабинетот на Чулев. Задржувањето на 15% од платата во следните шест месеци е практично единствената казна.
Сепак, додека советникот Ѓорѓевски си ја задржа работата без посериозни последици, за него има и кривична пријава. Доколку обвинителството одлучи дека елементи за сторено кривично дело може да се соочи и со судење за нападот.
Како Чулев ја скри „амнестијата“
Целата преписка за советникот на Чулев почна попладнево, откако Чулев, преку МИА, ја информираше јавноста дека ја прифатил „најстрогата дисциплинска мерка“ изречена за неговиот советник Зоран Ѓорѓевски-Чикаш.
Во соопштението што го пренесе МИА се вели и дека советникот на Чулев бил суспендиран, а дека до Чулев стигнало решение за прифаќање на најстрога дисциплинска мерка што тој ја потпишал.
Но, во соопштението никаде не беше споменато што е „најстрогата казна“ ниту пак колку долго траела супсензијата. Од неформални канали, подоцна се дозна дека министерот не соопштил повеќе детали во соопштението затоа што суспензијата траела еден ден, а единствената казна е 15 отсто помала плата во следните 6 месеци.
„360 степени“ упати прашања до Чулев и за „најстрогата дисциплинска мерка“ и за „суспензијата“. До моментот на објавување на овој текст, не добивме одговор.