Пет од вкупно 11 обвинети во случајот со незаконската легализација на објекти, меѓу кои и за просторот кај поранешниот ресторан „Имес“, и градењето на административната зграда на Општина Карпош, сакаат да признаат вина и да се спогодат со обвинителството. Меѓу обвинетите е и ексградоначалникот на Карпош, Стевче Јакимовски, но тој не е меѓу петмината кои сакаат да се спогодат.
Понудените спогодби се причина што утрово во Основниот кривичен суд во Скопје се одложи рочиштето за оценка на обвинителниот акт, поднесен на 31 октомври годинава. Четворица од обвинетите од претходно најавиле дека сакаат спогодба, а еден денеска.
Во моментов не е познато кои се тие кои понудиле спогодба. Во наредниот период, процедурата налага тие да се договорат со обвинителството за казната, а потоа спогодбата да се достави до судија на претходна постапка кој ќе треба да закаже рочиште.
„Откако обвинетите ќе се спогодат со јавниот обвинител, предлог – спогодбите ќе бидат доставени до судија на претходна постапка кој во рок од три дена од доставувањето треба да закаже рочишта по поднесените предлог – спогодби. За лицата со кои јавниот обвинител нема да постигне спогодба и за обвинетите што не дадоа изјави за признавање на вина закажано е ново рочиште за оценка на обвинителниот акт за 26 декември 2019 година“, велат од Обвинителството.
Јакимовски е првообвинет и се товари за повеќе кривични дела злоупотреба на службената положба и овластување и едно кривично дело бесправно градење.
Меѓу обвинетите се и раководен државен службеник и други службеници во општината, членови на комисијата за јавни набавки, одговорни лица од фирмите задолжени за изведба и за надзор.
Според обвинението, едно од нив се товари за злоупотреба на службената положба и овластување, седуммина за несовесно работење во служба и две за бесправно градење.
Во поднесеното обвинение кое треба да се оценува, меѓу другото се вели и дека во периодот од 2011-2017 година, Јакимовски заедно со раководен државен службеник во општината, ја искористиле својата службена положба и овластување во предмети каде биле поднесени барања за утврдување правен статус на бесправно изграден објект.
„Тие, иако знаеле и биле должни да знаат, дека објектите за кои се поднесени барањата се објекти што не смеат да бидат предмет на постапка за утврдување на правен статус на бесправно изградени објекти, ги потпишале урбанистичките согласности и дале согласност за вклопување на предметните времени објекти за деловна намена во урбанистичко-планската документација. Со потпишувањето на решенијата за утврдување правен статус на времените објекти за деловна намена како да се бесправно изградени објекти, овозможиле три фирми и едно физичко лице да се стекнат со право на сопственост на објектите и ексклузивно право на откуп на земјиштето под објектите кое било во сопственост на државата“, пишува во обвинението.
Тие иако знаеле дека постапката за легализација на времените објекти е спротивна на законот, овозможиле на две фирми преку спогодба да се стекнат со градежното земјиште за 438 денари за квадратен метар, иако според ценовникот за утврдување на пазарната вредност цената изнесувала 18.000 денари. На тој начин, според обвинителството, државниот буџет бил оштетен за 31.410.000 денари (околу 500.000 евра).
Јакимовски за овој случај беше и во куќен притвор, а во септември беше ослободен и му беа определени мерки на претпазливост.