Во однос на евроинтеграциите на земјава, заменик-помошниот секретар во Пентагон вели дека САД го гледаат процесот на членство во ЕУ како поширока евроатлантска интеграција со која ќе се надгради влезот на земјава во НАТО од 2020 година
Важно за регионалната и глобална безбедност е Северна Македонија да се фокусира на демократијата и владеење на правото, рече заменик-помошникот секретар за одбрана на САД за европска и НАТО политика Спенсер Бојер за Гласот на Америка на македонски.
На прашањето дали верува дека корупцијата во Македонија е закана за нејзината национална безбедност, тој вели дека она што ставот на Пентагон е оти владеењето на правото и демократијата се важни за да се има силни системи кои ќе придонесат и за регионалната и за глобалната безбедност.
„Ќе оставам на моите колеги од Стејт департментот да зборуваат за политиката и политичките напори што ги имаме со Северна Македонија. Она што можам да го кажам од страната на Одделот за одбрана е дека го гледаме нашиот однос како расте и како вистинска основа за севкупните билатерални односи. Се разбира, ние се грижиме за демократијата и владеењето на правото во целина за сите наши сојузници и партнери. Сметаме дека фокусирањето на тие работи и постоењето силни демократии се важни за да се има силни системи за да бидат отпорни, да придонесат пошироко за регионалната и глобалната безбедност. Така што тоа е секогаш важно“,
вели Бојер.
И за членството на земјава во ЕУ тој нагласува дека тоа е важно за безбедноста и стабилноста пошироко и тоа, вели, е нешто што САД го поддржува.
„Нема да навлегувам во спецификите на односот меѓу Бугарија и Северна Македонија за конкретни политички прашања. Тоа ќе го оставам на другите да го направат, но она што би го кажал за Европската Унија и аспирацијата на Северна Македонија да стане членка, е нешто што ние целосно го поддржуваме. Се разбира, зависи од Европската Унија да донесе сопствена одлука за членството, но ние го гледаме процесот на придвижување кон членство во ЕУ, пошироката евроатлантска интеграција, да се надгради на влезот на Северна Македонија во НАТО во 2020 година, како важно“,
вели заменик-помошникот секретар во Пентагон.
На прашањето дали можното натамошно одложување на пристапниот процес од една страна, и тензиите меѓу Косово и Србија од друга страна, треба да бидат аларм за ЕУ со оглед на ризикот од натамошна ескалација, тој одговара:
„Секогаш постои шанса нешто што е во одредена област да се прошири, и ние внимаваме на тоа и правиме сè што можеме како земја, и работиме со Северна Македонија и другите, да се обидеме да осигураме да го стабилизираме регионот“.
Во интервјуто Бојер зборува и за десетгодишен план за соработка во одбраната што минатиот месец го потпишаа САД и Северна Македонија, при што објаснува дека овој патоказ предвидува билатерална и регионална соработка и политика, модернизација на одбраната, соработка во однос на кибернападите и справување со дезинформациите.