Меѓународни експерти укажале дека попис не се прави со отпечаток од прст, бидејќи тоа не го дозволува законот за лица под 18 години
Не постои политичка терминологија што користи израз бојкот на пописот. Не постои. Вие може да не ги признаете резултатите, тоа е легитимно, меѓутоа не постои израз ќе ги повикаме граѓаните да го бојкотираат пописот. Такво нешто немам чуено досега да се случило во европската политика, вели претседателот на државата Стево Пендаровски, коментирајќи ги најавите дека е можен бојкот на пописот.
„За жал, пописот кај нас, и најчесто и на Балканот, повеќе е политичка отколку статистичка операција, затоа што ние сè уште, правата на човекот во меѓународна терминологија, ги гледаме пред сè низ националната призма. И кога се пребројуваме велиме силата е во бројките. Ако ние како Македонци сме, не знам 99 отсто, тогаш ќе имаме повеќе права и ние сме газди, сајбии во оваа држава или обратно, на пример Албанците… “,
истакнува Пендаровски во интербју за МИА, одговарајќи на прашањето зошто попиот се претвора во политичка, а не статистичка операција.
Ни законски ни по меѓународно право, не се зема отпечаток од прст од малолетници
Тој не гледа друга причина за политизација, освен како што вели, некоја скриена агенда, па на потпрашањето, на што конкретно мисли, тој посочува на ставовите на некои националистички кругови кои со години наназад ја оспоруваат бројноста на албанската заедница во земјава, која врз таа процентуална застапеност базира извесни уставни права. За Пендаровски луѓето треба да имаат што е можно повеќе права без разлика на бројките.
„По мое убедување ти треба на луѓето да им дадеш што е можно повеќе права не само на Албанци, на сите тука што живеат. Ако се 19,9 нема да имаат право, нели, тоа е пародија, а 20, итн. Постојат некои националистички кругови, не велам партии, меѓутоа кругови не се само поединци, кои велат тие и тогаш биле под 20 отсто, да им ги изземеме, да им ги ревидираме правата и статусот. Јас тврдам дека тоа е опасно. Јас тврдам дека секое одземање права на т.н. стекнати права по дефиниција ги прави луѓето гневни и создава причина за бунт и за незадоволство на една голема популација кај нас… Затоа не мислам дека треба да потпалуваме повеќе огнови од оние што веќе ги имаме години, години и веќе ги знаеме сите, пред сè во економско социјалната сфера во која тешко се живее, демографската сфера во која многу млади луѓе заминуваат, и уште ни фали и тука да направиме проблем каде што го нема. Утре ти ќе бидеш на власт“,
е ставот на претседателот на државата.
За барањето на опозицијата за спроведување на пописот со отпечаток од прст, Пендаровски вели досега не слушнал за таков пример некаде воопшто во Европа. Открива и дека меѓународни експерти укажале дека така попис не се прави.
„Јас знам дека премиерот се обиде да направи нешто, меѓутоа му беше кажано од многу меѓународни експерти дека така не се прави попис никаде во Европа, дури ни на Балканот. И особено не е можно да се направи отпечаток на прсти да се земе од малолетници под 18 години. Тоа ни по закон не е дозволено ни по меѓународна пракса“,
вели Пендаровски.