Неговата одлука за евентуална нова кандидатура вели дека ќе зависи од поддршката од партиите, но и од граѓанскиот блок
Актуелниот претседател Стево Пендаровски сè уште не донел одлука дали ќе се кандидира за втор мандат на претстојните претседателски избори закажани за 24 април и за 8 мај. Засега, вели Пендаровски во интервју за „360 степени“ на МРТ 1, шансите се поголеми да се кандидира отколку не.
„Ако ме прашувате денес, декември, шансите да се кандидирам се поголеми отколку да не се кандидирам“,
рече тој.
Прашан за тоа дали договорот меѓу партиите за двојни избори на 8 мај му одговара нему лично ако биде кандидат, Пендаровски коментира:
„Не верувам дека ми одзема или додава било што. Истото го мислам и за останатите потенцијални кандидати. Не може никој да ме убеди дека ако вие имате рејтинг или немате рејтинг во април, тоа ќе го изгубите или додадете во јуни. Или имате или немате“.
Неговата одлука за евентуална нова кандидатура вели дека ќе зависи од поддршката од партиите, но и од граѓанскиот блок.
„Засега, во овој временски период, потешко се мери она што го нарекуваме граѓански блок или луѓе кои не се асоцирани со партиските електорати, кои не се членови на политички партии. На некои анкети над 60% велат – не сме заинтересирани во принцип да гласаме. Меѓутоа, кога ќе бидете соочени во вториот круг со конкретна понуда, едниот или другиот, или едната или другата опција, во тој случај еден значаен дел од нив ќе се решат. Бидејќи нашите избори ретко биле ‘многу на малку’, таа мала маргина на тие што ќе решат да гласаат во вториот круг може да го реши победникот“,
смета актуелниот претседател.
Тој вели дека и покрај тоа што во 2014 година зад неговата кандидатура застанаа 18 политички партии, а потоа во 2019 застанаа 31 политичка партија, само со нивна поддршка немаше да биде избран.