Претседателот на Северна Македонија, Стево Пендаровски, очекува дека ратификацијата на Протоколот за членство на земјата во НАТО во шпанскиот парламент ќе биде завршена следниот месец.
„Ако сè оди според планот, кога станува збор за политичките текови, околу 10 март би требало тој процес да биде заокружен. Ќе останат само неколку технички детали кои треба да ги заврши Собранието во Скопје“,
рече Пендаровски, кој се наоѓа во официјална посета на Полска.
Шпанија е последна земја членка на НАТО која треба да го ратификува Протоколот за пристапување на Северна Македонија во НАТО, по што Скопје и официјално ќе стане 30-та полноправна членка на Алијансата.
Покрај за НАТО, Пендаровски во Полска зборуваше и за членството во ЕУ.
Тој таму одржа заедничка прес-конференција со полскиот претседател Анджеј Дуда, по која порача дека во фокусот на неговите средбите со полски домаќини било и е остварувањето и на нашата втора стратегиска цел – членството во Европската Унија, во контекст на претстојните самити на Унијата – во март во Брисел и во мај, во Загреб.
„Разменивме мислења и информации и за новата методологија за водење на пристапните преговори, како и за активностите што претходат на Европскиот совет во март. Оваа седмица треба да биде објавен и предлогот за новата преговарачка методологија, а за нас е клучно, час поскоро државите членки на Унијата да се усогласат за оваа методологија и пролетва да добиеме позитивни вести за нашата европска интеграција за време на хрватското претседателство со Европската Унија. Ние сме подготвени да ја прифатиме новата методологија за водење на преговорите, со цел да имаме ефективен процес на пристапување, со мерливи резултати и конкретни придобивки за граѓаните“, изјави Пендаровски.