Пендаровски во своето обраќање на сесијата посветена на Западен Балкан кажал дека според него перспективата за членство во Европската Унија не е потребна само за зајакнување на економијата, унапредување на трговската размена и подобрување на животниот стандард, туку дека е потребна и политичка интеграција во институциите на ЕУ, што ќе придонесе за демократскиот развој, зајакнување на институциите, владеење на правото и слободни медиуми
Забрзаната интеграција на земјите од Западен Балкан позитивно ќе влијае врз безбедноста, севкупните политички процеси, реформската агенда, како и врз еврооптимизмот во регионот.
Ова е ставот кој шефот на државата, Стево Пендаровски, го реафирмирал во своето обраќање вчеравечер на сесијата насловена „Дипломатски дијалог за Западен Балкан“, а во рамките на 54. Годишен состанок на Светскиот економски форум во Давос, Швајцарија, соопштија денеска од неговиот кабинет.
Во фокусот на дебатата, како што информираат од кабинетот на Пендаровски, биле перспективите за проширување на Европската Унија со земјите од Западен Балкан во поширокиот геополитички и безбедносен контекст, нивната подготвеност за реализација на реформите, очекувањата од европските избори, подобрувањето на економската интеграција на регионот и неговиот раст.
Пендаровски во своето обраќање на сесијата кажал дека според него перспективата за членство во Европската Унија не е потребна само за зајакнување на економијата, унапредување на трговската размена и подобрување на животниот стандард, туку дека е потребна и политичка интеграција во институциите на ЕУ, што ќе придонесе за демократскиот развој, зајакнување на институциите, владеење на правото и слободни медиуми.
„Претседателот Пендаровски истакна дека во време на мултиплицирани кризи, важно за стабилноста на Западен Балкан е да имаме поголемо европско присуство во регионот“,
се наведува во соопштението.
Инаку, меѓу излагачите на сесијата, како што се додава, биле и претседателката на Европската комисија, Урсула фон дер Лајен; сојузниот министер за европски и меѓународни работи на Австрија, Александер Шаленберг; министерот за надворешни работи на Украина, Дмитро Кулеба; претседателот на Србија, Александар Вучиќ; премиерот на Хрватска, Андреј Пленковиќ; премиерот на Црна Гора, Милојко Спајиќ; премиерот на Косово, Албин Курти; премиерот на Грузија, Иракли Гарибашвили; премиерот на Молдавија, Дорин Рецеан, и специјалниот претставник на ЕУ за дијалогот Белград – Приштина и за Западен Балкан, Мирослав Лајчак.
Инаку, шефот на државата од вторникот е во Давос, каде што учествува на 54. Годишен состанок на Светскиот економски форум во Давос, Швајцарија, годинава насловен „Обнова на довербата“.
Покрај синоќешната сесија посветена на Западниот Балкан, во агендата на шефот на државата е и негово учество на неформалниот собир на светските економски лидери „Враќање на вербата во глобалниот систем“ и на официјалната вечера „Градење на Европа на утрешнината“.
Пендаровски во Давос, меѓу останатите, имаше средба и со помошник-државниот секретар на САД за Европа и Евроазија, Џејмс О’Брајан, на која главни теми биле актуелните состојби поврзани со европските интеграции на С Македонија, реформскиот процес и политичките состојби во државава.
На неа, како што информираа од кабинетот на македонскиот претседател, шефот на американската дипломатија за Европа и Евроазија го изразил очекувањето на официјален Вашингтон дека земјава ќе го продолжи патот кон полноправно членство во Европската Унија.
„На средбата беше реафирмирана поддршката на САД за европските аспирации на Северна Македонија и беше изразено очекувањето од официјален Вашингтон дека државата ќе го продолжи патот кон полноправно членство во Европската Унија“,
се наведува во кусото соопштение од кабинетот на Пендаровски за средбата.