Претседателот Стево Пендаровски, попладнево, веднаш по изборот, ги прими членовите на преодната Влада за спроведување на изборите за пратеници.
Во соопштението се наведува дека Пендаровски го честитал изборот на новиот владин состав и изразил очекување „во овие историски моменти за нашата држава, кога треба да се заокружи полноправното членство во НАТО и да се одреди датум за почеток на пристапните преговори со Европската унија, да го потврдиме демократскиот капацитет на Северна Македонија и да се спроведат предвремените парламентарни избори во фер и демократска атмосфера“.
На фотографиите објавени на интернет-страницата на претседателот се гледа дека на приемот ги нема министрите избрани на предлог на опозицијата.
Од Кабинетот на претседателот за „360 степени“ потврдија дека тие не присуствувале.
„На приемот не дојдоа министрите за внатрешни работи и за труд и социјална политика, Чулев и Мизрахи. За причините за отсуството, ве упатуваме да ги прашате нив“, ни одговорија од Кабинетот на Пендаровски.
„360 степени“ се обрати и до ВМРО–ДПМНЕ, но досега не добивме одговор зошто избраните министри од опозицијата не дошле на приемот кај претседателот.
Собранието денеска попладне со 101 глас „за“ и ниту еден против или воздржан ја избра преодната влада чија примарна задача е да обезбеди услови за фер и демократски избори на 12 април.
На предлог на ВМРО-ДПМНЕ, Наќе Чулев и Рахела Мизрахи се министри за внатрешни работи, односно за труд и социјална политика, додека дополнителен заменик-министер за земјоделство е Цветан Трипуновски, заменик–министер за финансии Гордана Димитриеска-Кочоска, а заменик-министер за информатичко општество и администрација Невенка Стаменковска-Стојковски.
Тие попладнево во Собранието одржаа прес-конференција на која најавија дека влегуваат во институциите за да ја скенираат состојбата и обвинија за нивна партизација.
Поврзани написи:
Новата техничка влада си направи „фемили фото“
Избрани замениците – министри во техничката влада
(ВИДЕО) Пендаровски му го довери мандатот на Спасовски
Како ќе се избира техничката влада и кои ќе бидат правата и обврските на новите членови