Повеќе од два месеца, Армијата на Република Северна Македонија заедно со канцеларијата за одбранбена соработка при амбасадата на САД, реализираат проекти за поправка на постојната патна инфраструктура, како и за обележување и пробивање на траси за нови патни правци на армискиот полигон „Криволак“. Припадниците на инженерскиот баталјон денеска на претседателот Пендаровски му реферираа за тековните работи, како и за идните планирани активности во насока на инфраструктурно подобрување на „Криволак“.
Се планира инфраструктурно подобрување со систем обиколница и внатрешно поврзување со вкупна должина од околу 74 километри, со подготовка за воспоставување на влезови на полигонот од север, запад и од исток. Со новата инфраструктура, како што велат претставниците на инженерскиот баталјон, ќе се зголеми мобилноста во рамки на полигонот, како и капацитетот за изведување на вежби, на ранг на други развиени земји.
Претседателот Стево Пендаровски кој е и врховен командант на вооружените сили, истакна дека Северна Македонија како 30 земја членка на НАТО, има што да понуди на своите сојузници во Алијансата.
„Полигонот за вежби – Криволак, во кој изминатиов период се вложува многу со цел да се модернизира армискиот полигон е еден од нашите ресурси коишто можеме да ги понудиме на НАТО“,
рече Пендаровски.
При посетата на Армискиот полигон „Криволак“, претседателот Пендаровски беше информиран и за претстојната вежба „Одлучен удар 21“, како и за интензивната соработка на нашата Армија со Канцеларијата за одбранбена соработка при амбасадата на САД. Во рамки на таа соработка е и донацијата на материјали за изградба и поправка на патната инфраструктура на полигонот „Криволак”. Ова, како што истакна претседателот Пендаровски, е директна придобивка од членството на Северна Македонија во НАТО и соработката со САД, како еден од нашите најголеми стратешки партнери.