Шефот на државата за време на средбата порачал дека како земја членка на НАТО и аспирантка за членство во ЕУ, на овие избори државата мора да покаже максимална професионалност на институциите, но и политичка коректност и зрелост од страна на сите политички субјекти во изборниот процес
Очекување за одржување на фер, демократски и мирни избори согласно домашното законодавство, но и меѓународните обврски и стандарди денеска било изразено на средбата меѓу шефот на државата Стево Пендаровски и делегацијата на ад хок комисијата на Парламентарното собрание на Советот на Европа за набљудување на изборите која престојува во предизборна мисија во земјава.
За време на средбата, како што соопштија од кабинетот на Пендаровски, се разговарало за подготовките на двата изборни циклуса, како и за целите, активностите и очекувањата на предизборната мисија на ад хок комисијата на Парламентарното собрание на Советот на Европа.
„Делегацијата од ад хок комисијата на Парламентарното собрание на Советот на Европа информираше за целите на нивната предизборна мисија, како и за нивните активности, очекувања и улога во изборниот процес. На средбата беше изразено очекување дека претстојните претседателски и парламентарни избори ќе бидат фер, демократски и во мирна атмосфера, во целосна согласност со националното законодавство и меѓународните обврски и стандарди“,
се наведува во соопштението испратено од кабинетот на претседателот.
Пендаровски за време на средбата порачал дека како земја членка на НАТО и аспирантка за членство во ЕУ, на овие избори државата мора да покаже максимална професионалност на институциите, но и политичка коректност и зрелост од страна на сите политички субјекти во изборниот процес.