Претседателот најави дека за два дена од денес во Тирана ќе учествува на самитот „Украина – Југоисточна Европа“, каде што заедно со своите колеги ќе се сретне со претседателот на Украина, Володимир Зеленски, со цел да ја реафирмираме нашата јасна позиција за продолжување на помошта за Украина
Ние ќе продолжиме да бидеме на вистинската страна сè додека не настапи мирот кој ќе биде по волја на украинскиот народ и кој ќе обезбеди долгорочна стабилност и просперитет не само на Украина, туку и на европскиот континент. Ова денеска во својот говор на конференцијата „Украина – две години хероизам“ во организација на Амбасадата на Украина, а во соработка со ЦИВИЛ – Центар за слобода го рече претседателот Стево Пендаровски посочувајќи дека овие две години сме сведоци на сета нечовечност на еден режим, како што рече, отсечен од реалноста и излезен од најтемните времиња на европската историја од минатиот век, во целосен расчекор со реалноста на 21 век.
„Минатата година на овој ист ден посакавме никогаш повеќе да не се собираме за да ги одбележуваме годините на борбата за слобода на Украина, туку да го прославиме ослободувањето од рускиот окупатор и херизмот на украинскиот народ. За жал, денес бруталната агресија врз оваа наша пријателска држава од страна на режимот на Путин навлегува во третата година, а загубите во човечки животи, страдањата на милиони луѓе низ целата земја, девастирачките последици и разрушувањата не се намалуваат“,
рече тој.
На настанот беа присутни и амбасадорката на Украина, Лариса Дир, како и вицепремиерот за европски прашања Бојан Маричиќ, министерот за надворешни работи Бујар Османи, како и дипломатски претставници.
Таа персонална диктатура, рече Пендаровски дека се обидува не само да наметне ревизија на историјата, туку и да ги промени границите во Европа, во спротивност на сите меѓународно-правни договори коишто ги гарантираат мирот, стабилноста и безбедноста на континентот по крајот на Втората светска војна.
Според него, војната за слобода која Украина ја води денес е за праведна кауза, во името на сиот демократски и цивилизиран свет, кој, како што рече, мора да продолжи да помага сè до целосно ослободување на Украина, затоа што во таа борба, сите ние, вели тој, немаме право на пораз.
„Ние уште од првиот ден на агресијата се солидаризиравме и сочувствувавме со страдањата на милионите Украинци и бевме меѓу првите земји, коишто понуди воена, техничка и хуманитарна помош, којашот гласно се спротивстави на погазувањето на независноста, територијалниот интегритет и суверенитетот на Украина“,
вели претседателот Пендаровски.
Нашата позиција, вели претседателот, не е променета и две години од почетокот на агресијата.
„Заедно со сојузниците во НАТО Алијансата постојано вложуваме напори, помошта за Украина, којашто ѝ е повеќе од потребна, да не се одлага заради внатрешнополитичката динамика во државите сојузнички. Успесите на Украина денес не зависат само од волјата и од потенцијалите на украинската армија, туку и од финансиската, логистичката и, пред сè, воената помош којашто таа мора да ја добива. Секоја поинаква калкулација во овој контекст, ќе доведе до уште поголеми страдања, разрушувања во Украина и неизвесност за сите нас“,
рече тој.
Претседателот најави дека за два дена од денес, во Тирана ќе учествува на самитот „Украина – Југоисточна Европа“, каде заедно со неговите колеги ќе се сретне со претседателот на Украина Володимир Зеленски, со цел да ја реафирмираме нашата јасна позиција за продолжување на помошта за Украина.
„Ќе покажеме целосна поддршка за Украина слободно да го избере патот по кој ќе чекори во иднина. Ако тој пат вклучува волја и подготвеност за интегрирање на земјата и во ЕУ и во НАТО, тогаш ние мораме да дадеме поддршка на украинскиот избор“,
вели Пендаровски.
Според него, не е мал бројот на тие кои мислат дека со евентуалните промени на власта во неколку клучни демократски држави и организации во текот на оваа година, Украина ќе биде соочена со изборот да ги отстапи окупираните територии, во замена за мир, демилитаризација и воена неутралност, рече шефот на државата. Ваквиот исход, рече тој, би бил спротивен на волјата на украинскиот народ и ќе значи легитимирање на агресијата и сите злосторства извршени изминатите години.
„Најдобар доказ дека станува збор за сосема погрешни анализи е анексијата на Крим којашто се случи пред десет години и којашто поради отсуството на реакција на демократскиот свет, не го спречи натамошниот конфликт, туку само ја охрабри Москва, истото агресивно сценарио да го спроведе и на истокот на Украина неколку години подоцна“,
рече шефот на државата.
Во пресрет на последниот развој на ситуацијата на военото поле и повлекувањето на украинската армија од градот Авдеевка во источниот дел на државата, според него, единствено сплотеноста на демократскиот свет и робусната поддршка за украинските вооружени сили би можела да ги спречи натамошните руски пробиви, но и да овозможи враќање на териториите сè до границите на државата коишто беа меѓународно признаени по распадот на Советскиот Сојуз.
„Имајќи го ова предвид, неодамна донесената одлука на Советот на ЕУ за помош во износ од 50 милијарди евра и најавата дека американскиот Конгрес би можел да ја премости политичката блокада и да ја откочи помошта за Украина од околу 90 милијарди долари, се вистинскиот начин на кој треба да се дејствува во иднина. Во овој контекст, зборовите на американскиот државен секретар, дека ако Украина престане да се бори, ќе престане да постои, но ако Русија престане да напаѓа, ќе престане војната, најдобро ја опишуваат денешната ситуација и изборот со кој е соочен украинскиот народ, којшто се бори за својата татковина и за својата иднина“,
рече Пендаровски.
Според него, војната во Украина е најголемата закана за мирот и за европската безбедност, чијшто исход ќе влијае врз поредокот, не само на нашиот континент, туку и во меѓународните односи низ годините што доаѓаат.
„Војна којашто ќе покаже дали годините на демократски развој во Европа, по крајот на Студената војна, се залудно потрошени за реализација на една апстрактна идеја или, пак, демократијата сè уште е жилава и доволно силна да покаже отпорност кон ретроградните и авторитарни режими и предизвиците коишто тие ги создаваат. Војна која ќе покаже дали примената на сила ќе стане основниот принцип којшто треба да ја одредува природата на односите меѓу државите и во ова столетие или ќе остане на сила она што е запишано во Повелбата на Обединетите нации дека земјите членки се рамноправни меѓу себе, независно дали се мали или големи. Поради ова влогот на сиот демократски свет е огромен, а консеквенците од одбранбената војна којашто Украина денес ја води ги надминува нејзините граници“,
рече шефот на државата.