Најголема непозната засега е идната министерска постава од редовите на СДСМ во кабинетот што се очекува да го состави новиот партиски лидер Димитар Ковачевски
До кабинетот на претседателот Стево Пендаровски не е стигнато сѐ уште формално известување од Собранието дека е констатирана оставката на премиерот Зоран Заев, која повлекува оставка на целата влада.
Од кабинетот на Пендаровски потврдуваат за „360 степени“ дека сѐ уште не го добиле известувањето откако претпладнево оставката беше констатирана во парламентот. Велат дека откако ќе го добијат известувањето, во рамки на уставно предвидените 10 дена за одредување нов мандатар, очекуваат партијата или партиите кои имаат мнозинство во Собранието да го известат претседателот за тоа кој ќе биде кандидатот за формирање на новата влада.
Според најавите, иден премиер треба да биде новиот лидер на социјалдемократите, Димитар Ковачевски, во чиј кабинет, како и во парламентарното мнозинство, би учествувале партиите кои се дел од коалицијата на СДСМ, покрај ДУИ и новиот партнер – Алтернатива.
Рокот во кој шефот на државата треба да го одреди новиот мандатар, сметајќи од денеска, истекува на почетокот на јануари следната година, доколку се чека до последен ден за давање на мандатот. Потоа почнува да тече рокот од 20 дена во кои мандатарот треба да го состави кабинетот, односно списокот со министри и да го достави во парламентот заедно со програма за работа.
Според тоа, новата влада би можела да биде избрана во парламентот до крајот на следниот месец, доколку се чекаат последните рокови, вклучително со терминот во кој треба да се одржи собраниската седница. Доколку процесот оди побрзо и се скратат роковите, изборот на новата влада би можел да заврши и кон средината на јануари, со оглед на тоа што коалициските партнери веќе ги имаат договорено повеќето детали.
Најголема непозната засега е идната министерска постава од редовите на СДСМ во кабинетот што се очекува да го состави Ковачевски, со оглед на најавите дека дел од досегашните министри нема да останат на функциите (некои од нив сами соопштија дека заминуваат од Владата) додека за дел, наводно, се планира ротација во други ресори. ДУИ, пак, како што се најавува, главно планира да го задржи досегашниот министерски состав, а Алтернатива веќе извести за тоа кој од нејзините редови ќе учествува во новиот состав на извршната власт.
Во периодот од 2018 година, кога беше избран на функцијата, Пендаровски досега во два наврати даваше мандат за состав на Влада: Минатата година му го даде мандатот на Заев за да го формира вториот кабинет, со ДУИ и Беса, а претходно, на крајот на 2019 година, му го даде мандатот на Оливер Спасовски за да биде на чело на преодната (предизборна влада).
