Америка и светот со страхопочит гледаат на херојството на украинскиот народ. Соочени со ужасните злосторства на Путин, украинските борци за слобода го инспирираа светот со железна волја и нескршлив дух – возвраќајќи против бруталната, неоправдана инвазија на Русија, наведува Пелоси во отвореното писмо до Зеленски
Претседателката на Претставничкиот дом на САД, Ненси Пелоси, објави отворено писмо дo Володимир Зеленски, во кое го покани украинскиот претседател денеска лично да се обрати во Конгресот на САД.
Зеленски денеска се очекува да пристигне во Вашингтон на неговото прво меѓународно патување од почетокот на војната на 24 февруари.
„Почитуван господине претседателе, со огромна почит и восхит кон вашето извонредно лидерство, упатувам покана во име на двопартиското раководство на Конгресот да се обратите на заедничкиот состанок на Конгресот в среда, 21 декември 2022 година. Америка и светот со страхопочит гледаат на херојството на украинскиот народ. Соочени со ужасните злосторства на Путин, украинските борци за слобода го инспирираа светот со железна волја и нескршлив дух – возвраќајќи против бруталната, неоправдана инвазија на Русија“,
наведува Пелоси во дел од писмото до Зеленски.
Пелоси во писмото до украинскиот претседател истакнува дека „борбата за Украина е борба за самата демократија“.
„Борбата за Украина е борба за самата демократија. Со нетрпение очекуваме да ја слушнеме вашата инспиративна порака за единство, издржливост и решителност. Ви благодариме за вашето водство и земањето предвид на ова барање“,
пишува Пелоси.
Рано утрово украински претседател потврди дека е на пат за САД. Зеленски на Твитер објави дека ќе има средба со американскиот претседател Џо Бајден на која, како што наведе, ќе разговараат за соработката меѓу Украина и САД.
Тој, исто така, потврди дека ќе одржи говор пред Конгресот и ќе имам серија билатерални состаноци.
Посетата на Зеленски на САД доаѓа во време кога американските парламентарци се подготвуваат да гласаат за нов голем пакет помош за Украина, пренесе АФП.