Покрај лидерка на демократите, Пелоси во два мандати беше и претседателка на Претставничкиот дом, прва жена на оваа функција. Додека Камала Харис не стана потпретседателка, таа беше најмоќната жена избрана за некоја функција во историјата на САД
Во говорот се потсети на работењето со Обама и со Бајден, но и со републиканецот Буш, а одбегна да го спомене Трамп кој два пати беше отповикан под нејзино раководство
Претседателката на Претставничкиот дом на САД, Ненси Пелоси (82), објави дека по речиси две децении се повлекува од функцијата лидерка на демократите во Конгресот.
Таа ќе остане во Претставничкиот дом како претставничка на Сан Франциско, тоа што беше и изминатите 35 години, а на лидерската позиција во групата на демократите се очекува да ја наследи Хаким Џефрис.
„Нема да барам реизбор за лидер на демократите. Дојде часот нова генерација да ја предводи демократската пратеничка група“,
рече Пелоси која од 2003 беше на таа позиција.
Последните години, таа беше под постојан притисок да се повлече и местото да го препушти на помладите колеги. Денешната нејзина објава следува еден ден откако беше потврдено и дека републиканците обезбедија тенко мнозинство во Претставничкиот дом по минатонеделните избори, со што Пелоси ќе замине и од претседателската функција на која веројатно ќе ја наследи републиканецот Кевин Мекарти.
Соопштувајќи ја одлуката, Пелоси доби овации од колегите демократи. Во говорот кажа дека досега работела со тројца американски претседатели – републиканецот Џорџ Буш и демократите Барак Обама и Џо Бајден. Таа не го спомена Доналд Трамп, кој два пати беше отповикан од Претставничкиот дом под нејзино раководство.
Меѓутоа, во говорот алудираше на нападот на Конгресот на 6 јануари 2021 година од страна на поддржувачите на Трамп.
„Американската демократија е величествена, но е кревка. Многумина од нас, од прва рака посведочија на нашата кревкост. Тоа е трагично. И затоа демократијата мора засекогаш да се брани од силите кои ѝ посакуваат штета“,
рече Пелоси.
Ненси Пелоси важи за политичарка која преку Претставничкиот дом одигра централна улога до носењето на законодавната агенда на Бајден, како и претходно на Обама, меѓу што и познатиот закон за здравствена заштита во 2010 година.
На функцијата претседателка на Претставничкиот дом, пак, таа беше во два мандати. Првиот го доби во 2006 кога демократите по една деценија ја презедоа контролата во овој дом. Со тоа, Пелоси стана и првата жена на функцијата претседател на Претставничкиот дом.
На претседателското столче се врати во 2018 година.
Претседателот на претставничкиот дом, замениците и претседателите на комисиите одредуваат кои предлог-закони ќе се разгледуваат и гласаат. Тие го поставуваат дневниот ред и одлучуваат за правилата за дебата.
Оваа функција е и втора по ред во хиерархијата (по потпретседателот на САД), за наследник на претседателската функција. Со ова, Пелоси се до лани беше најмоќната жена избрана на некоја функција во историјата на САД. Но, тоа се смени со изборот на Камала Харис за потпретседателка.