„Од пациентите кои се лекуваат надвор, во критична состојба се петмина, но состојбата флуктуира. Седми ден е, нула починати“, нагласи министерот за здравство
Министерот за здравство Арбен Таравари денеска, по завршувањето на редовниот состанок на кризниот штаб, информира за состојбата со пациентите од трагедијата во Кочани и рече дека сите кои се лекуваат во македонските болници се во стабилна и добра состојба.
Девет пациенти би требало да бидат испишани на почетокот на неделата, откако ќе им бидат направени токсиколошки и психолошки испитувања.
„Надвор од државата се 115 пациенти, во критична состојба продолжуваат да бидат пет пациенти, но состојбата на пациентите флуктуира. Седми ден е, нула починати. Нема ниту еден пациент кој починал. Очекуваме да се подобрува состојбата“,
рече Таравари.
Вчера министерот за надворешни работи Тимчо Муцунски рече дека македонски пациенти што настрадаа во трагедијата се лекуваат во 14 држави, и тоа: во Србија, Бугарија, Турција, Грција, Шпанија, Австрија, Унгарија, Хрватска, Белгија, Литванија, Италија, Словенија, Шведска и во Полска.