Еден пациент е хоспитализиран во болницата во Битола откако вчера беше донесена одлука таа да биде нов регионален центар за третман на пациенти со ковид-19, информираше на денешната прес-конференција министерот за здравство Венко Филипче. Дополнително, како што вели, таму ќе се префрлат и сите пациенти што досега се лекуваа во болницата во Охрид.
„Практично, сите пациенти што досега се лекуваа во Охрид, а сега се трансфериираат во Битола, се пациенти од околината на Струга“,
изјави Филипче.
Како што кажа Филипче и на вчерашниот брифинг, во Битола во посебно одделение, кое е физички одделено од останатиот дел од болницата, веќе се обезбедени кревети, респиратори и тим од медицински лица.
Филипче изјави дека уште четири пациенти вчера биле примени во болницата „8 Септември“ во Скопје и за нив се чекаат резултати, а други двајца се на респираторна машина.
На Инфективната клиника во Скопје, пак, сместени се вкупно 70 пациенти од кои 8 се на респираторни машини.