Пациент од Струмица за медиумите вели дека не жали за дадените пари, тврдејќи дека двете хемофилтрации кои ги примил во Клиниката „Жан Митрев“ му го спасиле животот
Пациенти задоволни од лекувањето со методот на хемофилтрација од ковид-19 во Клиничката болница „Жан Митрев“ во Скопје, денеска јавно зборуваа за тоа пред клиниката, додека паралелно тече истрагата во обвинителството за оваа клиника токму поради лекувањето на ковид-19 со методот на хемофилтрација.
Луѓето кои денеска јавно го раскажаа своето искуство со вирусот тврдат дека биле во животна опасност, како и дека токму методот на хемофилтрација им помогнал да оздрават.
„Бев во лоша ситуација, после само два дена по заразување со коронавирусот ми откажаа белите дробови. Сатурацијата ми беше под 80. Не сакаше ни Брза помош да ме земе. Сам возев и ме примија во Клиниката“,
раскажа еден пациент за медиумите.
Тој додава дека тимот на доктори и на техничари и на болничари бил премногу професионален, негата на високо ниво, по влошување на неговата ситуација завршил на респиратор и веќе не можел да стане од кревет.
„По првата хемофилтрација за која што го прашаа и татко ми, и мене и сите, ја одобривме. По неколку часа од првата хемофилтрација јас се опоравив, почнав да јадам и веќе наредниот ден ме ставија во обична соба. По јадењето и лекувањето неколку дена во обична соба они мене ме пуштија дома“,
истакна пациентот.
Друг пациент од Струмица, вели дека не жали за дадените пари, тврдејќи дека двете хемофилтрации кои ги примил во Клиниката „Жан Митрев“ му го спасиле животот.
„Ако има нешто институциите нека ја бркаат работата, меѓутоа тоа со хемофилтрација, тоа што вас најмногу ве интересира, мислам дека не е забранета. И никој никого не терал на сила. Беа известени и домашните и ние како пациенти дали сакате или не сакате”,
вели овој пациент.
Од друга страна, оваа реакција на дел од пациентите доаѓа откако обвинителството, еден ден по емитувањето на документарниот филм „Нечиста крв“ на ИРЛ, на 18 јули, оформи предмет по допрен глас за да го испита начинот на лекување на пациентите во приватната болница „Жан Митрев“ во периодот на пандемијата со коронавирусот од 2020 до 2022 година.
На 12 август Обвинителството отвори истрага во која сопственикот на болницата д-р Жан Митрев е осомничен за Измама на пациенти. Судот му го одзеде пасошот како мерка на претпазливост поради опасност од бегство.